ខែ មករា « 2007 « យុវជនឆ្នើម

សបា្តហ៍ទី១

ខែ មករា 27, 2007

សប្តាហ៍ទី១ : សុភី និង មិនា ត្រលប់ទៅផ្ទះវិញ

នៅក្នុងសបា្តហ៍ទីមួយ លោក ជា សំណាង បានប្រគល់កិច្ចការសំខាន់មួយគឺ ការរៃអង្គាសប្រាក់ជួយដល់កុមារកំព្រានៅអង្គការគ្រួសារថ្មី ដល់បេក្ខជនទាំង១៦រូប ។

ចៅក្រម ទាំងបីនាក់ ដែលមាន លោក ជា សំណាង ក. សេង ធារី និង លោក ម៉ាក សារ៉ាត មានវត្តមាននៅក្នុងការរៀបចំបែងចែកបេក្ខជនទាំងអស់ជា២ក្រុមដែល មានគ្នា៨នាក់ ។ ជាដំបូងបេក្ខជនទាំងអស់ចាប់ឆ្នោតដើម្បីរកប្រធានក្រុម ។ ក្រោយពេលរកបានប្រធានក្រុម ប្រធានក្រុមទាំង២រើសសមាជិកក្រុមខ្លួនម្តងម្នាក់ៗសំរាប់រៀបចំ ការប្រកួត ។

មិនា លោក ជា សំណាង ដាក់ឈ្មោះក្រុមដែលមាន ក. ព្រំ សុគន្ធារី ជាប្រធាន ថា ក្រុមហ្វូណន និង ក្រុមមួយទៀតដែលមានបុរសជាប្រធានគឺ លោក សួន ចំរើនភារៈ ថា ក្រុមចេនឡា ។ ក្រោយពីស្តាប់ការណែនាំរបស់ចៅក្រមទាំង៣រូប ក្រុមនីមួយៗទទួលថវិការ៥០ដុល្លារ ដើម្បីទុកចំណាយលើការរៀចចំ ។

បន្ទាប់ពីការ បែងចែកក្រុម និងទទួលវិញ្ញាសារ ក្រុមទាំង២ក៏ចូលរួមក្នុងសិក្ខាសាលាខ្លីរយៈពេល២ម៉ោងស្តីពី “ការរៃអង្គាសប្រាក់” ដែលសំរបសំរួលដោយ…

អានត…

ទំលាក់ មួយវិចារ » | វិញ្ញាសារ | តំណភ្ជាប់អចិន្ត្រៃ
បានដាក់ប្រកាស ដោយ doubleu

ហ៊ុល ស្រីនាង

ខែ មករា 27, 2007

ស្រីនាង ស្រីនាងមានអាយុ ២០ឆ្នាំ មានស្រុកកំនើតនៅទីក្រុងភ្នំពេញ សព្វថ្ងៃជានិស្សិតឆ្នាំទី១នៅសាកលវិទ្យាល័យបៀលប្រាយ ។

មតិរបស់ស្រីនាង
អំពីការចូលរួមក្នុងកម្មវិធីយុវជនឆ្នីម៖
កត្តាដែលជំរុញទឹកចិត្តនាងចូលរួមការប្រកួតប្រជែងនេះ ដោយកត្តាទីមួយ គឺដោយសារតែកម្មវិធីនេះល្អណាស់ ព្រោះការប្រកួតប្រជែងលើសមត្ថភាពមេដឹកនាំទើបតែមាន ហើយវាមានសារសំខាន់សម្រាប់ប្រទេសនីមួយៗ ការប្រកួតប្រជែងនេះនឹងធ្វើឲ្យយើងជ្រើសបានមេដឹកនាំដែលមានសមត្ថភាពពិត ហើយពេលណាមានមេដឹកនាំដែលមានសមត្ថភាពពិតនោះ សង្គមពិតជាមានការអភិវឌ្ឍន៍ទៅមុខរហូត ។
កត្តាទីពីរ គឺចង់ដឹងពីសមត្ថភាពផ្ទាល់ខ្លួន ថាតើខ្ញុំមានសមត្ថភាពដឹកនាំគេបានដែរឬអត់ ព្រោះខ្ញុំមានគោលបំណងចង់បើកក្លឹបមួយ ។
កត្តាទីបី គឺជាបទពិសោធន៍ និង ការបង្កើនចំណេះដឹង ព្រោះខ្ញុំយល់ថា ប្រសិនជាខ្ញុំចូលរួមប្រកួត ខ្ញុំច្បាស់ជាទទួលបានបទពិសោធន៍ ទោះបីជាខ្ញុំធ្លាក់ ឬ ជាប់ក៏ដោយគ្រាន់តែថា បទពិសោធន៍នោះវាតិច ឬ ច្រើនតែប៉ុណ្ណោះ ចំពោះបទពិសោធន៍ ខ្ញុំធ្លាប់មានខ្លះមកហើយ ទើបខ្ញុំចូលរួមក្នុងការប្រកួតប្រជែងនេះ ព្រោះខ្ញុំអាចដឹងខ្លះៗពីមេដឹកនាំ វាពិតជាមានការលំបាកណាស់ ព្រោះវាទាមទារភាពអំណត់ និង ពេលវេលាច្រើន ។
អំពីភាពជាអ្នកដឹកនាំ ៖
មេដឹកនាំសំដៅទៅលើមនុស្សដែលប្រកបដោយលក្ខណៈសម្បត្តិគ្រប់គ្រាន់ ទាំងចំណេះវិជ្ជា ទាំងចរិយាសម្បត្តិ អាចគ្រប់គ្រង និង ដឹកនាំកិច្ចការអ្វីមួយបានហើយជាទូទៅមិនថានៅក្នុងគ្រួសារ សហគមន៍ ក៏ដូចជានៅក្នុងប្រទេសជាតិចាំបាច់ត្រូវការអ្នកដឹកនាំដែលប្រកបទៅដោយសមត្ថភាព ចំណេះដឹង បទពិសោធន៍ និង មានសីលធម៌ថ្លៃថ្នូរ ដូចនេះដើម្បីឲ្យក្លាយជាមេដឹកនាំល្អម្នាក់គួរតែមានគុណសម្បត្តិដូចជា ៖
- ចេះដឹកនាំ និង គ្រប់គ្រងប្រកបដោយបទពិសោធន៍
- គោរពច្បាប់រដ្ឋធម្មនុញ្ញ
- ស្គាល់បញ្ហា និង សេចក្ដីត្រូវការរបស់សង្គម សហគមន៍ សមាគមន៍ អង្គការ និង នៅតាមអង្គការផ្សេងៗទៀត ។
អំពីបទពិសោធន៍ ៖
- ធ្លាប់ធ្វើជាមេដឹកនាំនៅមជ្ឈមណ្ឌលកុំព្យូទ័របាក់ទូក
- ធ្លាប់ធ្វើការនៅក្រុមហ៊ុន Mike Allan International Corporate Consultants pte ដែលការដឹកនាំនោះមានការលំបាកខ្លះ ព្រោះខ្ញុំត្រូវប្រើពេលច្រើនដូចជា ដំបូងហៅពួកគេមកជួបជុំគ្នាហើយផ្ដល់ព័ត៌មានជូនពួកគេព្រមទាំងរៀបចំ និង មើលឯកសាររបស់ពួកគេថាតើគេមានគ្រប់ ឬ អត់ បន្ទាប់មកត្រូវនាំចុះ Outside ដោយត្រូវបែងចែក និង កំនត់ម៉ោង ហើយសង្កេតមើលសកម្មភាពនៃការផ្ដល់ព័ត៌មានរបស់ពួកគេ ហើយខ្ញុំតែងតែធ្វើតេស្តពីសកម្មភាពនៃការផ្ដល់ព័ត៌មាន បើមានខ្វះខាតខ្ញុំត្រូវផ្ដល់ព័ត៌មានបន្ថែម និង សង្កេតមើលពីភាពលំបាករបស់ពួកគេ ហើយបានស្រាវជ្រាវស្វែងរកកន្លែងដែលល្អសម្រាប់ពួកគេចុះ Outside ។
ប្រសិនបើជាប់ជាយុវជនឆ្នើម ៖
ការដែលនាងខ្ញុំចូលរួមប្រកួតប្រជែងក្នុងកម្មវិធីនេះ នាងខ្ញុំមានសេចក្ដីសង្ឃឹមតិចណាស់ក្នុងការទទួលបានជោគជ័យ ទោះបីខ្ញុំធ្លាប់មានបទពិសោធន៍ប្រហែលជា ៦០% ក៏ដោយ ក៏ខ្ញុំយល់ថាបទពិសោធន៍នេះតិចតួចណាស់ ហើយខ្ញុំតែងតែសួរអ្នកដែលមានបទពិសោធន៍ច្រើនជាងខ្ញុំជានិច្ច ប៉ុន្តែប្រសិនបើនាងខ្ញុំទទួលបានជ័យលាភីសម្រាប់ការប្រកួតប្រជែងនេះ ខ្ញុំពិតជាមានមោទនភាពចំពោះខ្លួនឯងខ្លាំងណាស់ព្រោះការទទួលបានជ័យលាភីនេះជាបទពិសោធន៍សំខាន់ និង មានសារសំខាន់បំផុត ហើយចំពោះគំរោងដែលនាងខ្ញុំមានបំណងគឺ ចង់បង្កើតនូវក្លឹបដែលក្នុងនោះផ្ដោតទៅលើកុមារ និង យុវជន ព្រោះបច្ចុប្បន្នបញ្ហាកើតមានចំពោះកុមារមានមួយចំនួន ជាពិសេស គឺ កុមារដែលរស់នៅក្នុងជីវភាពក្រលំបាក និង ភាពអនាថា ជាកត្តាដែលនាំឲ្យខ្វះចំណេះដឹង ហើយបញ្ហាខ្វះចំណេះដឹងនេះ វាមានផលអាក្រក់ច្រើនណាស់ ហើយចំពោះយុវជនវិញ ក៏ដូចគ្នាដែរ ព្រោះពួកគេគឺជាសសរទ្រូងនៃប្រទេសជាតិ ។
អំពីទស្សនៈវិស័យ ៖
ស្ថានភាពរបស់យុវជនកម្ពុជាក្នុងពេលបច្ចុប្បន្ននេះមានមួយភាគធំមានការរីកចំរើនទាំងចំណេះដឹង និង សមត្ថភាព ព្រោះនៅក្នុងប្រទេសកម្ពុជាយើងមានការបង្កើតនូវអង្គការ សមាគមន៍ ក្រុម ឬ ក្លឹបដោយក្នុងនោះដឹកនាំដោយកុមារ និង យុវជនផ្ទាល់តែម្ដង ។ ខ្ញុំយល់ថាស្ថានភាពយុវជនមានភាពល្អប្រសើរហើយ នៅតែមួយភាគតូចប៉ុណ្ណោះ ដូចនេះយើងគួរតែនាំគ្នាជួយពន្យល់ ផ្សព្វផ្សាយមិនថាតាមមធ្យោបាយណាក៏ដោយឲ្យតែស្របច្បាប់ដើម្បីឲ្យយុវជនទាំងនោះយល់ដឹងពីតម្លៃរបស់ខ្លួន ដោយភាពប្រឹងប្រែងចេះជួយខ្លួនឯងដើម្បីជួយឲ្យគ្រួសារមានភាពថ្លៃថ្នូរ និង សង្គមមានការរីកចំរើន ឲ្យពួកគេដឹងពីតួនាទី និង ការទទួលខុសត្រូវក្នុងការចូលរួមសហការគ្នាអនុវត្តការងារឲ្យបានសម្រេចដល់ទិសដៅដែលបានគ្រោងទុកប្រកបដោយប្រសិទ្ធភាព និង តម្លាភាព ។

ទំលាក់ មួយវិចារ » | បេក្ខជន | តំណភ្ជាប់អចិន្ត្រៃ
បានដាក់ប្រកាស ដោយ doubleu

កូវ គារ៉ា

ខែ មករា 27, 2007

គារ៉ាមានអាយុ ២៤ឆ្នាំ មានស្រុកកំនើតនៅខេត្តកំពត សព្វថ្ងៃជានិស្សិតឆ្នាំទី៤នៅសាកលវិទ្យាល័យនីតិសាស្ត្រ និងវិទ្យាសាស្ត្រសេដ្ឋកិច្ច ។
មតិក្នុងការជំរុញទឹកចិត្ត ៖
- ចង់បង្ហាញនូវសមត្ថភាពនៃភាពជាអ្នកដឹកនាំឲ្យយុវជនក៏ដូចជាសង្គមកម្ពុជាទាំងមូលបានដឹង និង ទទួលស្គាល់នូវសមត្ថភាពដែលមាន
- ចូលរួមចំណែកក្នុងការបង្ហាញនូវភាពគំរូនៃអ្នកដឹកនាំដល់អ្នកដឹកនាំផ្សេងៗ
- ចែករំលែក និង ស្វែងរកបទពិសោធន៍នៃភាពជាអ្នកដឹកនាំដល់យុវជនខ្មែរដទៃទៀត
- វាស់ស្ទង់នូវសមត្ថភាពដែលខ្លួនមានទៅនឹងយុវជនដទៃទៀតក៏ដូចជាអ្នកដឹកនាំមួយចំនួនផងដែរ
- ចង់ដឹងនូវរបៀបរបប ឬ ក៏និតិវិធីនៃការជ្រើសរើសយុវជនឆ្នើម
- ដើម្បីចូលរួមបង្ហាញនូវភាពជាគំរូដល់យុវជនឲ្យយល់ពីតម្លៃនៃយុវជនឆ្នើម និង ជំរុញឲ្យយុវជនបានយល់ និង ចូលរួមប្រកួតប្រជែង និង បង្ហាញពីសមត្ថភាពរបស់ខ្លួនក្នុងការជ្រើសរើសយុវជនឆ្នើម
- ដើម្បីចូលរួមក្នុងការលើកទឹកចិត្តដល់ក្រុមប្រឹក្សាយុវជនកម្ពុជា ជាពិសេសគណកម្មការរៀបចំកម្មវិធីជ្រើសរើសយុវជនឆ្នើម ។
អំពីភាពជាអ្នកដឹកនាំ ៖
- មានកាយសម្បទាគ្រប់បរិបូរណ៍ និង កំលាំងមាំមួយ សុខភាពល្អ
- ជាមនុស្សដែលមានចំណេះដឹងខ្ពង់ខ្ពស់ ស្គាល់បញ្ហា និង តម្រូវការរបស់សង្គមដែលខ្លួនគ្រប់គ្រង
- ជាមនុស្សទៀងត្រង់ និង ចេះបត់បែនតាមកាលៈទេសៈ
- ជាមនុស្សមានការតស៊ូ អំណត់ព្យាយាម ភាពក្លាហាន និង ឆ្លងកាត់បទពិសោធន៍ច្រើន
- ជាមនុស្សមានតម្លាភាព និង សុច្ចរិតភាពក្នុងខ្លួន មិនកេងប្រវ័ញ្ច មិនគិតពីប្រយោជន៍ផ្ទាល់ខ្លួន
- ជាមនុស្សដែលមានគំនិតច្នៃប្រឌិតខ្ពស់ និង មើលឃើញពីភាពវែងឆ្ងាយ
- មានភាពចាស់ទុំក្នុងការដឹកនាំ និង ចេះដឹងពីច្បាប់ទម្លាប់សង្គមជ្រៅជ្រះ
- ជាមនុស្សដែលមានការសន្ដោសដោយបច្ច័យ ៤ និង ព្រហ្មវិហារធម៌ក្នុងខ្លួន
- ជាមនុស្សដែលចេះឃុំគ្រងអារម្មណ៍ក្នុងខ្លួន និង ស្ថានការណ៍នានា ។
អំពីបទពិសោធន៍ ៖
- ធ្វើជាអ្នកសម្របសម្រួលសិក្ខាសាលាស្ដីពី គ្រឿងញៀន និង សុខភាពរបស់យុវជន
- តួនាទីជាមិត្តអប់រំមិត្តនៅក្នុងសហគមន៍
- ដឹកនាំយុវជនចុះបង្រៀនពីបញ្ហាសុខភាព និង បរិស្ថាន
- ដឹកនាំក្រុមចុះផ្សព្វផ្សាយ និង ចែកខិតប័ណ្ណស្ដីពីការប្រឆាំងអំពើពុករលួយ
- ដឹកនាំយុវជនចូលរួមសិក្ខាសាលាស្ដីពី គុណភាពអប់រំនៅឧត្ដមសិក្សា
- ដឹកនាំក្រុមរៀបចំសន្តិសុខ និង សណ្ដាប់ធ្នាប់ថ្ងៃទិវាសិទ្ធិមនុស្ស ១២ ធ្នូ
- ដឹកនាំក្រុមយុវជនចុះសុំហត្ថលេខា និង ការគាំទ្រញ្ញត្តិផ្សេងៗ
- ដឹកនាំក្រុមនិស្សិតចុះសិក្សា និង ស្រាវជ្រាវឯកសារនៅធនាគារពិភពលោក ធនាគារអភិវឌ្ឍអាស៊ី និង ក្រសួងពាណិជ្ជកម្ម ព្រមទាំងនាយកដ្ឋានជលផលនៃក្រសួងកសិកម្ម រុក្ខាប្រមាញ់ និង នេសាទ ។
ប្រសិនបើជាប់ជាយុវជនឆ្នើម ៖
ខ្ញុំនឹងបន្តធ្វើនូវសកម្មភាពកន្លងមកនេះ ក្នុងនាមខ្ញុំជានិស្សិត និង ជាយុវជនមួយរូបក្នុងសង្គម ជួយលើកទឹកចិត្ត និង ជំរុញឲ្យយុវជនកម្ពុជាគ្រប់រូបបានចូលរួមនូវសកម្មភាពរបស់សង្គម និង ការសម្រេចចិត្តផ្សេងៗរបស់រដ្ឋាភិបាលតាមរយះជាសារ ឬ ជាសម្លេងផ្ទាល់របស់យុវជន ហើយនឹងរៀបចំសមាជយុវជនថ្នាក់ជាតិមួយ ដែលមានការចូលរួមពីសំណាក់យុវជនជាតិ និង អន្តរជាតិ ហើយនឹងអញ្ជើញអ្នកតំណាងសំខាន់ៗ ដែលទាក់ទងនឹងកម្មវិធីយុវជនឲ្យមកចូលរួមដូចជា តំណាងរដ្ឋាភិបាលកម្ពុជា ព្រឹទ្ធសភា រដ្ឋសភា អង្គការសង្គមស៊ីវិលនានា ប្រចាំនៅកម្ពុជា ពិសេសតំណាងអង្គការសហប្រជាជាតិដែលទាក់ទងយុវជន ដើម្បីឲ្យយុវជនសម្ដែងនូវការបារម្មណ៍ កង្វល់ ការលំបាក និង បញ្ហានានាដែលយុវជនកំពុងជួបប្រទះនៅពេលបច្ចុប្បន្នទៅរដ្ឋាភិបាល និង តំណាងសង្គមស៊ីវិល និង អង្គការសហប្រជាជាតិឲ្យគេបានយល់ពីស្ថានភាពពិតរបស់យុវជនកម្ពុជា ពិសេសធ្វើការដោះស្រាយដែលប្រកបដោយប្រសិទ្ធភាព និង តម្លាភាពឲ្យយុវជន ។
អំពីទស្សនៈវិស័យ ៖
ស្ថានភាពយុវជនកម្ពុជាបច្ចុប្បន្ន កំពុងជួបប្រទះបញ្ហាជាច្រើនដោយធ្វើការពិនិត្យជារួម អំពីយុវជនដែលស្ថិតនៅតំបន់ជនបទ និង ខេត្តឆ្ងាយៗ កំរិតចំណេះដឹងនៅទាបនៅឡើយ ពួកគេពុំមានលទ្ធភាពធ្វើការងារ ឬ ប្រកបអាជីវកម្មខ្លួនឯងបានទេ ដោយសារតែអសមត្ថភាព កង្វះសាលារៀន កង្វះអាហាររូបត្ថម្ភ និង ស្ថានភាពក្រីក្រនៃប្រទេសកម្ពុជាបច្ចុប្បន្ន ហើយសម្រាប់យុវជននៅទីក្រុង និង និស្សិតដែលសិក្សានៅតាមសកលវិទ្យាល័យផ្សេងៗវិញ មានមួយចំនួនកំពុងតែធ្លាក់ចូលក្នុងផ្លូវមួយដែលសង្គមស្អប់ខ្ពើម និង មិនទទួលស្គាល់ និង ការធ្លាក់ចុះនៃសីលធម៌របស់យុវជន ។
ដើម្បីធ្វើឲ្យយុវជនប្រសើរឡើង គឺត្រូវកាត់បន្ថយភាពក្រីក្រ ឲ្យយុវជនបានចូលសិក្សាដើម្បីឲ្យយុវជនទទួលចំណេះដឹងដែលជាតិត្រូវការជាចាំបាច់ និង ធ្វើការអប់រំ និង ផ្សព្វផ្សាយពីគ្រឿងញៀន អេដស៍ និង សុខភាពបន្តពូជ ឲ្យបានទូលំទូលាយដល់យុវជននៅតាមមូលដ្ឋានដែលគេកំពុងរស់នៅ ។

2 វិចារ | បេក្ខជន | តំណភ្ជាប់អចិន្ត្រៃ
បានដាក់ប្រកាស ដោយ doubleu

ព្រំ សុគន្ធារី

ខែ មករា 27, 2007

សុគន្ធារី មានអាយុ ២៣ឆ្នាំ មានស្រុកកំនើតនៅទីក្រុងភ្នំពេញ សព្វថ្ងៃជានិស្សិតឆ្នាំទី៣នៃសាកលវិទ្យាល័យភូមិន្ទនីតិសាស្រ្ត និងវិទ្យាសាស្ត្រសេដ្ឋកិច្ច ។

មតិរបស់កញ្ញា ព្រំ សុគន្ធារី

យុវជន គឺជាវ័យ កំពុង សាកល្បងចង់ចេះចង់ដឹងនិងចង់ឈ្នះចាញ់ ដើម្បី ប្រកួត ប្រជែងកសាងស្នាដៃសំរាប់ខ្លួនឯង ការប្រកួតប្រជែងនេះដើម្បីកសាង និង ពង្រឹង សមត្ថភាព នៃភាព ក្លាហាន អោយកាន់ តែខ្លាំង មានន័យថាកំពុងតែជំរុញឆន្ទះ របស់ខ្លួន ដើម្បី ចូល ប្រឡូក សកម្មភាព នយោបាយ យុវជនឈានទៅរក ភាពជា អ្នកដឹក នាំវ័យក្មេង និង បញ្ញាស្មារតី កាយសម្បទា រឹងមាំ។ យុវជនតែងតែមានមោទនភាពនិង ភាព ជឿជាក់ ចំពោះខ្លួនឯងពិសេស គឺនាងខ្ញុំ ផ្ទាល់ គឺ ផ្តល់ឳកាស និងតំលៃ នែទេពកោសល្យ ពីធម្មជាតិ ផ្ទាល់ខ្លួន គឺ មានសមត្ថភាពនិងធ្លាប់ មានបទពិសោធន៍ផង។ ដើម្បី វាស់ស្ទង់ កំរិត និង ធ្វើការវាស់ តំលៃចំពោះខ្លួនឯង តើមានសមត្ថភាពប៉ុណ្ណា។ ខ្លួនយើងនិងចេះបត់បែនរកគន្លឹះដោះស្រាយបញ្ហាដែលកំពុងជួបនឹងមុខ។ ខ្ញុំយល់ថាប្រធានបទនេះពិតជាមានសារសំខាន់ណាស់សំរាប់យុវជនបច្ចុប្បន្ននិងអនាគតវាដើរតួនាទីមុខគេក្នុងការដឹកនាំប្រទេសទាំងមូលជាល់ស្ដែងយុវជននិងការបោះឆ្នោត។ ប្រទេសជាតិរឹងមាំទៅបានអាស្រ័យយុវជនមានសីលធម៌និងសុជីវធម៌ខ្ពស់និងចំនេះដឹងខ្ពស់ ។

ស្តីពីភាពជាអ្នកដឹកនាំ៖
ភាព ជា អ្នក ដឹកនាំ
ជាមនុស្ស មាន អំណោយ ទានល្អ។
ស្គាល់ខ្លួនឯង ច្បាស់ និង អ្នកដទៃ ខន្តីខ្ពស់ ។
សំដី ម៉ឺងម៉ាត់ និងពីរោះ ។
បំពេញប្រយោជន៍រួមសម្រាប់ការងារ ។
មានចំនេះដឹងចំនេះធ្វើសមត្ថភាព ។
ចេះដកស្រង់បទពិសោធន៍ល្អប្រមូលនិងវិភាគពត៌មានគ្រប់ជ្រុងជ្រោយ ។
អ្នកដឹកនាំត្រូវជាមនុស្សមានចិត្តទូលាយ ។
អ្នកត្រូវចេះបន្ទាបខ្លួន។
មូលហេតុចំបងដែលនាំអោយអ្នកដឹកនាំជានិច្ចកាលផ្សារភ្ជាប់រវាង” ការសប្បាយរីករាយនិងគំនិតគិតគូរត្រិះរិះ” ។
បើកចិត្តហ៊ានទទួលយកការពិតពិសេសក្លាហានហ៊ានទទួលការទិះទៀនដើម្បីស្ថាបនា។
មានបញ្ញា្ស្មារតីនិងកាយសម្បទារឹងមាំ។
ត្រូវមានគុណសម្បត្តិនិងសីលធម៌សុជីវធម៌យ៉ាងប្រសើរ។

បទពិសោធន៍ផ្ទាល់ខ្លួន៖
ធ្វើប្រធានតាំងពីថ្នាក់បឋមរហូតដល់មហាវិទ្យាល័យ(បច្ចុប្បន្ន)ហើយឈានទៅដល់ប្រធានវគ្គជំនាន់ទី១៦នៃមជ្ឈមណ្ឌលបណ្ដុះបណ្ដាលផែនការស្ថិតិ(PSTC)។
ធ្លាប់ដឹកនាំក្រុមនិសិ្សតនិងយុវជនធ្វើដំនើរទស្សនៈទៅរមណីដ្ឋានចំបក់និងកម្មសិក្សា។
ជាអ្នកសំរបសំរួលកម្មវិធីសិក្ខាសាលានិងវេទិការផ្សេងៗពាក់ព័ន្ធយុវជននិងសរសេររបាយការណ៍។
រកសំលេងញាតិ្តស្ដីពី” ការសុំដោះលែងសកម្មជនសិទ្ធិមនុស្ស” បានចំនួន២០០សំលេងក្នុងមួយថ្ងៃ។
ជាប្រធានក្រុមយុវជនស្ម័គ្រនៅ(YRDP)ដឹកនាំកម្មវិធីរៃអង្គាសថវិការមនុស្សធម៌សំរាប់ទ្រទ្រង់ក្មេងកំព្រានិងថែរក្សាអ្នកជំងឺអេដស៍ចំនួនពីរលាននាក់។
ជាអ្នកដឹកនាំយុវជនតាមក្រុមក្លឹបនីមួយៗដើម្បីចងជា ប្រព័ន្ធជាបណ្ដាញយុវជនប្រចាំសមាគមន៍នៅតាមខេត្ត កណ្ដាលកំពង់ចាម តាកែវ និង កំពង់ឆ្នាំង ភ្នំពេញ។
ជាអ្នកសង្កេតការណ៍នៅរដ្ឋសភាជាតិនៃអង្គការYYC ។
ធ្លាប់ចូលវគ្គបណ្ដុះបណ្ដាលច្រើនណាស់និងសកម្មភាព ធំៗជាមួយNGOsនិងសន្និសិទថ្នាក់ជាតិ។

ប្រសិនបើជាប់ជាយុវជនឆ្នើម៖
បន្តសិក្សាអោយកាន់តែខ្ពង់ខ្ពស់ពីព្រោះដើម្បីពង្រឹងសមត្ថភាពបន្ថែមទៀត ។
បើមានឱកាសគួរតែរៀបចំកម្មវិធីសន្និសិទយុវជនឆ្នើមវេទិកាពិគាក្សាផ្លាស់ប្ដូរបទពិសោធន៍រវាងយុវជនក្រៅស្រុកនិងក្នុងស្រុក។
ចងក្រងបណ្ដាញយុវជនថែមទៀតនិងតែងអត្ថបទពាក់ព័ន្ធនឹងស្្នារដៃបញ្ចូលកតាមវេបសាយ ផ្សេងៗទូទាំងប្រទេស។
បំផុសនិងជំរុញលើកទឹកចិត្តអោយបណ្ដាញយុវជនចូលរួមអោយបានច្រើនជាងមុនជាពិសេសបណ្ដុះគំនិតអោយយុវជនមានឆន្ទៈយ៉ាងមុតម៉ាំចំពោះខ្លួនឯងនិងសង្គមបង្កើនកំលាំងចិត្តនិងភាពជឿជាក់។
ពង្រឹងប្រព័ន្ធផ្សព្វផ្សាយពត៌មានពាក់ព័ន្ធនិងសកម្មភាពយុវជនក្នុងស្រុកនិងក្រៅស្រុកអោយកាន់តែទំនាក់ទំនងល្អយ៉ាងស្អិតរមួតឡើង។
ណែនាំក្រុមយុវជនដទៃទៀតអោយស្គាល់ពីតំលៃនៃការចូលរួមទាំងអស់វាពិតជាសំខាន់ណាស់និងបង្កើនទំនាក់ទំនងនិងចំនេះដឹងថ្មីៗ។
រក្សាកិត្តិយសនិងស្នាដៃយុវជនវ័យក្មេងដ៏ឆ្នើមសំរាប់ខ្លួនឯងគ្រួសារនិងសង្គមជាតិទៀត។

ស្ថានភាពយុវជននៅកម្ពុជាសព្វថ្ងៃនេះនៅមានកំរឹតនៅឡើយទាំងការចូលរួមវគ្គនិងសកម្មភាពប្រជុំផ្សេងៗទៀតមិនសូវពេញទំហឹងទេ។យុវជនមានគំនៀបមួយគឺជំងឺធ្លាក់ទឹកចិត្តនិងបាក់ស្បាតផ្នែកផ្លូវចិត្តនិងអារម្មណ៍។ពីព្រោះខ្ញុំយល់ឃើញថាសកម្មភាពដង្ហែក្បួន(យុទ្ធនាការ)មានចំនួនតិចតួចនិងការកំនត់យកចូលរួមការប្រជុស៊ុំតវ៉ាជាមួយអាជ្ញាធរនិងអ្នកមានអំនាចគឺមិនហ៊ានទេមិនហ៊ានតស៊ូមតិទេ។បញ្ហាទស្សនៈកិច្ចកម្មសិក្សាព្រំដែននិងបញ្ហាព្រៃឈើមានការភ័យក្លាចណាស់មិនហ៊ានចូលរួមយ៉ាងកុះករទេ។បន្ដែបើមានកម្មវិធីវគ្គសុខភាពបញ្ហាគ្រឿងញៀននិងវគ្គទូទៅមានការចូលរួមច្រើនណាស់។
ទាំងនោះហើយធ្វើអោយក្រុមយុវជនមានគំលាតរវាងយុវជននិងរដ្ឋាភិបាលណាស់។ថ្នាក់ដឹកនាំច្រើនតែគំរាមគំហែងពួកគេមិនអោយបង្កចលាច័លសង្គមទេទាំងការជួបប្រជុំ។គួរតែរដ្ឍាភិបាលយកចិត្តទុកដាក់អោយខ្លាំងដូចជាNGOsមួយចំនួនធំបានបំពេញកាតព្វកិច្ចល្អណាស់ច្រើនជាងរដ្ឋាភិបាលទៅទៀតជាក់ស្ដែងYYCមានកន្លែងធ្វើការស្ម័គ្រចិត្តសំរប់និស្សិត វគ្គបណ្ដុះបណ្ដាល វេទិកាយុវជនតាមវិទ្យុ ការចូលរួមប្រជុំជាអាជ្ញាធរ។

ទំលាក់ មួយវិចារ » | បេក្ខជន | តំណភ្ជាប់អចិន្ត្រៃ
បានដាក់ប្រកាស ដោយ doubleu

សួន ចំរើនភារៈ

ខែ មករា 27, 2007

ភារៈមានអាយុ២២ឆ្នាំ មានស្រុកកំនើតនៅក្នុងខេត្តពោធិ៍សាត់ សព្វថ្ងៃជានិស្សិតនៅសាកលវិទ្យាល័យអាស៊ានឆ្នាំទី៣ ។
មតិរបស់សួនចំរើនភារៈ ៖
កត្ដាដែលជំរុញទឹកចិត្តខ្ញុំអោយចូលរួមក្នុងការប្រកួតនេះមាន ៖
- ចង់បង្ហាញសមត្ថភាពអោយគេដឹងក៏ដូចជាខ្លួនឯងបានដឹងថា តើខ្លួនឯងមានគុណសម្បត្តិ និង គុណវិប្បត្តិជាអ្នកដឹកនាំយ៉ាងដូចម្ដេចខ្លះ
- ចង់បាននូវបទពិសោធន៍ និង ចំនេះដឹងផ្សេងៗទាក់ទងនឹងភាពជាអ្នកដឹកនាំ និង វិធីសាស្ត្រសំរាប់ដឹកនាំ ។
- ចង់បាននូវការទទួលស្គាល់ជាស្ដង់ដារនូវភាពជាអ្នកដឹកនាំដើម្បីអោយខ្លួនក្លាយជាអ្្នកដឹកនាំនៅថ្ងៃអនាគត់ ។
- ដើម្បីហាត់ពត់ និង លត់ដំបន្ថែមនូវចំនុចខ្សោយរបស់ខ្លួនដើម្បីអោយខ្លួនក្លាយជាអ្នកដឹកនាំដ៏ឆ្នើមនៅថ្ងៃអនាគត់ និង ដើម្បីដឹកនាំសង្គមក៏ដូចជាប្រទេសជាតិអោយមានការរីកចំរើន និង ឧត្ដមរុងរឿង ។
- ចង់ក្លាយជាគំរូនៃអ្នកដឹកនាំដើម្បីអោយប្រទេសកម្ពុជាមានអ្នកដឹកនាំដ៏ល្អ និង ដើម្បីអោយប្រទេសកម្ពុជាទទូលសន្ដិភាព និង ភាពថ្កុំថ្កើង ។
ភាពជាអ្នកដឹកនាំ ៖
លក្ខណៈរបស់អ្នកដឹកនាំល្អម្នាក់គួរមានគុណសម្បត្តិ ៖
- មានកាយសម្បទាល្អ សុខភាពល្អ អត្តចរឹកល្អ អាកប្បកិរិយាល្អ ។
- មានសមត្ថភាព មានចំនេះដឹង មានបញ្ញាឈ្លាសវៃ ឬ ឧត្តមគតិខ្ពស់ក្នុងការដឹកនាំមិនគិតពីប្រយោជន៍ផ្ទាល់ខ្លួន ។
- មានចិត្តស្មោះត្រង់ គុណធម៌ល្អ មានចិត្តសប្បុរស យុតិ្តធម៌ដោយប្រកាន់យកលទ្ធិប្រជាធិបតេយ្យ មានចិត្តអត់ធ្មត់ក្នុងការងារ ។
- មានចិត្តក្លាហាន ម៉ឺងម៉ាត់ មានការទទួលខុសត្រូវរាល់កិច្ចការងារ ។
- យល់ពីតំរូវការរបស់សមាជិក ឬ ក្រុមការងារ ស្គាល់កាលៈទេសៈ ចេះបត់បែនតាមស្ថានការណ៍ ចេះទទួលស្គាល់ការពិត បើចេះមើលចិត្តមនុស្សកាន់តែល្អ ។
- ចេះអត់អោនអ្នកក្រោមបង្គាប់ខ្លួន យល់ដឹងពីច្បាប់បានទូលាយ ។
បទពិសោធន៍ផ្ទាល់ខ្លួន៖
សកម្មភាព ឬ បទពិសោធន៍ជាអ្នកដឹកនាំ ឬ ធ្លាប់បានចូលរួមការងារសង្គមមាន ៖
- ដឹកនាំក្រុមដង្ហែរក្បួនស្ដីពីជំងឺអេដស៍ សិទ្ធិមនុស្ស ទប់ស្កាត់អំពើហិង្សា ទប់ស្កាត់ការបំពុលបរិស្ថាន យ៉េនឌ័រ និង កូដកម្មដំឡើងប្រាក់ខែកម្មករ ។
- ដឹកនាំក្រុមចុះសិក្សា និង ស្រាវជ្រាវស្ដីពី ទំនាស់ដីធ្លី (ភ្នំពេញថ្មី ភូមិសំបុកចាប) ស្ថានភាព និង ជីវភាពរស់នៅរបស់ប្រជាជន (ភូមិរកាខេត្តកណ្ដាល) ការបាត់បង់ព្រៃឈើ (ត្រាំកក់ ខេត្តកំពុងស្ពឺ) ការរំលោភសិទ្ធិមនុស្ស (សហជិពកម្មករ ភូមិ៧៨) ការប្រើប្រាស់អំពើហិង្សា (ភូមិរកា ខេត្តកណ្ដាល)។
- ដឹកនាំក្រុមចុះបង្រៀន និង បើកសិក្ខាសាលាស្ដីអំពី យុវវ័យ និង សីលធម៌ (វិទ្យានកាមិតក្រោយសណ្ឋាគាភ្នំពេញ) ការអភិវឌ្ឍន៍ខ្លួនឯង និង តំលៃក្នុងសង្គម (សហការជាមួយអង្គការម៉ាវិណុលនៅអន្លុងក្រង៉ាន) ការទប់ស្កាត់អំពើហិង្សាដោះស្រាយទំនាស់ និង ច្បាប់នៃអំពើហិង្សា (នៅភូមិរកា ខេត្តកណ្ដាល)
- ដឹកនាំក្រុមសំដែងឈុតខ្លីៗស្ដីពី ជំងឺអេដស៍ (ប៉ុស្តិ៍លេខ៩) យុវជន និង ការងារធ្វើ (កំពង់សោម) សិទ្ធិសេរីភាពយុវជនទាក់ទង និង សុខភាពបន្ដពូជ និង ជំងឺអេដស៍ (ប៉ុស្ដិ៍លេខ៩) នៅមានច្រើនទៀត ។
ប្រសិនបើជាប់ជ័យលាភី ៖
ខ្ញុំបាទមានក្រុមយុវជនពីរក្រុមគឺក្រុមទី១ឈ្មោះ SPAD=Student four Peace and Development ក្រុមនេះធ្វើការលើការកសាងសន្ដិភាព និង អំពើហិង្សាក្នុងគ្រួសារ ចំនែកក្រុមទី២គឺក្រុម VWB = Volunteer Without Border ក្រុមនេះធ្វើការលើការជួយសង្រោះកុមារ ។ ដូចនេះបើពេលអនាគត់ខ្ញុំបានទទួល
ជ័យលាភីពីការប្រកួតប្រជែងនេះ នោះខ្ញុំនឹងពង្រីកក្រុមទាំងពីរនេះអោយកាន់តែខ្លាំងក្លាបំផុត ។លើសពីនេះទៅទៀតខ្ញុំបាទនឹងចូលរួមអភិវឌ្ឍន៍ និង កសាងប្រទេសកម្ពុជានេះអោយក្លាយជាប្រទេសមួយដែលប្រកបដោយអហិង្សាសកម្ម និង សន្ដិភាពពេញលេញ ។
អំពីទស្សនៈវិស័យ ៖
តាមគំនិតរបស់ខ្ញុំ ខ្ញុំយល់ឃើញថាប្រទេសកម្ពុជាជាប្រទេសមួយដែលមានប្រជាជនសរុបចំនួនជាង ១៣ លាននាក់ក្នុងនោះដែរយុវជនគឺមានចំនួន ៧០% ទៅហើយប៉ុន្ដែចំនួនយុវជនទាំងអស់នោះគួរតែទទួលបានការយកចិត្តទុកដាក់អោយខ្លាំងក្លាតែផ្ទុយទៅវិញពួកគេមិនបានទទួលអ្វីសោះពីប្រទេសជាតិពួកគេបែរជាទទួលបានការប្រើប្រាស់សំរាប់ជាឈ្នាន់ទៅតាមវិស័យផ្សេងៗទៅវិញ ។ ជារៀងរាល់ឆ្នាំមានយុវជនច្រើនធ្វើចំនាកស្រុកទៅរកការងារនៅក្រៅប្រទេស (ក្នុងនោះមិត្តភក្តិខ្ញុំក៏មានជាង ៣០ នាក់ដែរ) ។ លទ្ធិផលរបស់ពួកគេទាំងនោះគឺអ្នកខ្លះត្រូវបានសំលាប់នៅតាមជាយដែន អ្នកខ្លះញៀនថ្នាំ អ្នកខ្លះកើតអេដស៍ អ្នកខ្លះចាញ់ស្លាប់ពេលត្រឡប់មកដល់ផ្ទះវិញ អ្នកខ្លះពិការព្រោះត្រូវទារណ្ឌកម្មផ្សេងៗពេលគេចាប់បាន…..។ ចំនែកយុវជនផ្សេងដែលបានទៅធ្វើការចំនាកស្រុកទេនោះអ្នកខ្លះគ្មានការងារធ្វើនាំគ្នាទទួលទានស្រាបង្កបញ្ហាបងតូចបងធំហើយបង្កអសន្ដិសុខដល់សង្គម ។ ចំនែកឯយុវជននៅទីក្រុងភាគច្រើនជាសិស្ស និង និស្សិតដែលព្យាយាមក្រេបជញ្ជក់ចំនេះដឹង និង បទពិសោធន៍ ។ មិនតែប៉ុន្នោះពួកដើរស្ម័គ្រចិត្តអស់រាប់ឆ្នាំនៅគ្មានការងារដែលបានកំរៃសំរាប់ផ្គត់ផ្គង់ខ្លួនគេបាន (ជាក់ស្ដែង ដូចជារូបខ្ញុំស្ម័គ្រចិត្តអស់រយៈពេល ៣ឆ្នាំ) ។

១ វិចារ | បេក្ខជន | តំណភ្ជាប់អចិន្ត្រៃ
បានដាក់ប្រកាស ដោយ doubleu

រុន វណ្ណយ៉ា

ខែ មករា 27, 2007

វណ្ណយ៉ា មានអាយុ១៨ឆ្នាំ មានស្រុកកំនើតនៅស្រុកមុខកំពូលខេត្តកណ្តាល សព្វថ្ងៃរស់នៅក្រុងភ្នំពេញ ជានិស្សិតឆ្នាំទី១នៅ សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ។
មតិក្នុងការជំរុញទឹកចិត្ត ៖
នាងខ្ញុំចង់បញ្ចេញសមត្ថភាព និង ចំណេះដឹង ហើយចង់ចូលរួមគ្រប់សកម្មភាពទាំងអស់របស់សង្គមក្នុងនាមជាយុវជន ដែលជាសសរទ្រូងដ៏ថ្លៃថ្នូរមួយរបស់ប្រទេសជាតិ ជាពិសេសនោះ មានបំណងចង់សិក្សារៀនសូត្រ ពិសោធន៍ និង ចំណេះដឹងថ្មីៗ អំពីបញ្ហាយុវជនដើម្បីអភិវឌ្ឍន៍ខ្លួនខ្ញុំឲ្យក្លាយជាមនុស្សម្នាក់ដែលមានប្រយោជន៍ចំពោះសង្គម ព្រោះថាសង្គមត្រូវការយុវជនជាចាំបាច់ បើយុវជនល្អចេះចូលរួមក្នុងសង្គម នោះសង្គមនឹងមានការអភិវឌ្ឍន៍រីកចំរើន ដូចនេះហើយយុវជនត្រូវចូលរួមក្នុងការងារសង្គម ជាពិសេស ចង់ក្លាយជាអ្នកដឹកនាំមួយរូបប្រកបដោយសមត្ថភាព សេចក្ដីក្លាហាន និង សេចក្ដីថ្លៃថ្នូរ ដែលទទួលបានការគាំទ្រពីពលរដ្ឋ ជាទីពេញចិត្តរបស់ពលរដ្ឋទាំងអស់ក្នុងសង្គម ។
អំពីភាពជាអ្នកដឹកនាំ ៖
អ្នកដឹកនាំល្អត្រូវគោរពគោលការណ៍ប្រជាធិបតេយ្យជាធំ មានយុត្តិធម៌ ជាអ្នកស្រលាញ់ច្បាប់ យកច្បាប់ជាធំ គោរពសិទ្ធិមនុស្ស ចេះស្គាល់សុខទុក្ខរាស្ត្រ ស្ដាប់មតិ និង សំណូមពរ ហើយឆ្លើយតបយ៉ាងសមស្របទៅនឹងសេចក្ដីត្រូវការរបស់ប្រជាពលរដ្ឋ ត្រូវមានសុខភាពល្អ រាងកាយមាំមួន ឈ្លាសវៃ ចេះក្ដាប់បាននូវកាលៈទេសៈ វៃឆ្លាត ក្នុងការមើលឃើញគ្រប់ទិដ្ឋភាពនៃការរស់នៅ មានភាពក្លាហាន ឆន្ទះមោះមុត ហ៊ានតស៊ូមតិ និង អំណត់ព្យាយាម ចេះដោះស្រាយបញ្ហាសង្គមដោយសន្តិវិធី ស្រលាញ់អហិង្សា ចេះលើកទឹកចិត្តពលរដ្ឋឲ្យគោរពច្បាប់ ហើយត្រូវមានទំនាក់ទំនងល្អពីថ្នាក់លើដល់ថ្នាក់ក្រោម គិតពីប្រយោជន៍រួមជាធំជាងប្រយោជន៍ផ្ទាល់ខ្លួន និយាយរួមត្រូវមាន អភិបាលកិច្ចល្អតាមបែបលទ្ធិប្រជាធិបតេយ្យ ។
អំពីបទពិសោធន៍ ៖
- ក្នុងនាមជាយុវជនជាសសរទ្រូងប្រទេសជាតិមួយរូបនាងខ្ញុំបានទទួលបទពិសោធន៍ជាអ្នកដឹកនាំដោយបានសិក្សាពីកិច្ចពិភាក្សាភាពជា
- អ្នកដឹកនាំ នៅ Harps well Foundation ជារៀងរាល់សប្ដាហ៍
- ចូលរួមបរិច្ចាកឈាមនៅពេលក្រុមកាកបាទក្រហមត្រូវការអ្នកស្ម័គ្រចិត្តដើម្បីជួយជនរងគ្រោះ
- ចូលរួមជាយុវជនស្ម័គ្រចិត្តនៃអង្គការកាត់បន្ថយអាវុធ ដើម្បីចុះផ្សព្វផ្សាយដល់ប្រជាពលរដ្ឋឲ្យយល់ពីកាតព្វកិច្ច ច្បាប់អាវុធ និង ផលលំបាកនៃការប្រើប្រាស់អាវុធ
- ចូលរួមក្នុងទិវាសិទ្ធិមនុស្ស ដោយចុះតាមទីស្នាក់ការប៉ុស្តិ៍នគរបាល និង សង្កាត់ជាច្រើនដើម្បីបើកកិច្ចពិភាក្សា បញ្ហាការប្រើប្រាស់អាវុធក្នុងគោលបំណងរក្សាសន្តិសុខ និង ការគោរពសិទ្ធិមនុស្សក្នុងសង្គម តាមរយះអង្គការ (WGWR) ។
ប្រសិនបើជាប់ជាយុវជនឆ្នើម ៖
នាងខ្ញុំនឹងខិតខំជំរុញ និង លើកទឹកចិត្តយុវជនឲ្យកាន់តែមានសកម្មភាពចូលរួមក្នុងសង្គមកាន់តែខ្លាំង លើកកំពស់ស្មារតីយុវជនឲ្យស្គាល់ពីកាតព្វកិច្ចរបស់ខ្លួន ហើយចាប់ផ្ដើមបង្កើតជាក្រុមអាចឈានដល់ជាសហគមន៍យុវជនឡើង ដើម្បីការពិភាក្សាបញ្ហា ការផ្លាស់ប្ដូរគំនិតយោបល់ ដែលពាក់ព័ន្ធទៅនឹងផលប្រយោជន៍រួម ដូចជា បញ្ហាសិទ្ធិមនុស្ស លទ្ធិប្រជាធិបតេយ្យ យេនឌ័រ … បង្កើតឲ្យមានវគ្គបណ្ដុះបណ្ដាលចំណេះដឹងដល់យុវជន បំផុសភាពក្លាហានដល់យុវជន ហើយបន្ទាប់ពីយុវជនរឹងមាំហើយនោះសកម្មភាពរបស់យុវជនកាន់តែខ្លាំងក្លាដែលជាកត្តាបំផុសរបស់សហគមន៍ និង ប្រទេសជាតិ ដើម្បីប្រទេសមាន លទ្ធិប្រជាធិបតេយ្យ បង្កើនប្រសិទ្ធភាពនៃការអភិវឌ្ឍន៍ប្រទេសជាតិ ។
អំពីទស្សនៈវិស័យ ៖
ស្ថានភាពរបស់យុវជនកម្ពុជាក្នុងពេលបច្ចុប្បន្នគឺ មានភាពល្អប្រសើរយ៉ាងខ្លាំង ដោយសព្វថ្ងៃ យុវជនបានខិតខំរៀនសូត្របន្តការសិក្សារហូតដល់ថ្នាក់បរិញ្ញាប័ត្រ អនុបណ្ឌិត បណ្ឌិត ហើយពួកគេបានចូលរួមយ៉ាងខ្លាំងក្លានៅក្នុងសង្គមដូចជា ការចូលរួមទាំងអង្គការក្រៅរដ្ឋាភិបាល និង ក្នុងរដ្ឋាភិបាល ជួយផ្សព្វផ្សាយចំណេះដឹងដល់ប្រជាពលរដ្ឋឲ្យយល់ដឹងពីសិទ្ធិ កាតព្វកិច្ច និង លទ្ធិប្រជាធិបតេយ្យជាច្រើន ។ ប៉ុន្តែក៏មានយុវជនខ្លះពុំមានលទ្ធភាពបន្តការសិក្សាហើយខ្លះទៀតតែងបង្កបញ្ហាយ៉ាងច្រើនដល់សង្គមដូចជា ភ្លើតភ្លើន សប្បាយភ្លេចខ្លួន មិនខិតខំសិក្សាហើយបណ្ដោយខ្លួនទៅប្រើប្រាស់គ្រឿងញៀន បងតូចបងធំ ហើយឈានដល់ការឆក់ប្លន់ដែលបង្កនូវភាពអសន្តិសុខដល់សង្គម ។ ចំពោះបញ្ហានេះ រដ្ឋាភិបាលត្រូវយកចិត្តទុកដាក់បំផុសលើយុវជនដូចជា ពង្រឹងការអប់រំ ច្បាប់ ផ្ដល់វគ្គបណ្ដុះបណ្ដាលដល់យុវជនទាំងផ្នែកឯកជន និង រដ្ឋ ហើយយុវជនខ្លួនឯងត្រូវចេះអភិវឌ្ឍន៍ខ្លួនឯង ខិតខំរៀនសូត្រ ស្គាល់ពីតម្លៃនៃចំណេះដឹង បណ្ដុះស្មារតីសមគ្គីជាតិ ស្រលាញ់ជាតិ ។

ទំលាក់ មួយវិចារ » | បេក្ខជន | តំណភ្ជាប់អចិន្ត្រៃ
បានដាក់ប្រកាស ដោយ doubleu

ស៊ុន សុវត្ថា

ខែ មករា 27, 2007

សុវត្ថា សព្វថ្ងៃជានិសិ្សតឆ្នាំទី៥ នៅមហាវិទ្យាល័យវេជ្ជសាស្រ្តនៃសាកលវិទ្យាល័យវិទ្យាសាស្ត្រសុខាភិបាល។ សុវត្ថាមានស្រុកកំនើតនៅទីក្រុងភ្នំពេញ ។
មតិក្នុងការជំរុញទឹកចិត្ត ៖
ជាការពិតក្នុងនាមជាយុវជនម្នាក់ ខ្ញុំតែងតែពេញចិត្តនឹងចូលរួមរាល់សកម្មភាពទាំងឡាយណាដែលទាក់ទងនឹងយុវជន និង រាល់សកម្មភាពផ្សេងៗដែលពាក់ព័ន្ធក្នុងការងារសង្គម ដើម្បីប្រតិបត្តិខ្លួនជាជនដែលមានប្រយោជន៍ដល់សង្គមជាតិ ។ ការប្រកួតប្រជែងនេះ ជាការផ្ដល់ឱកាសដ៏ពេសេសសម្រាប់យុវជនកម្ពុជារួមទាំងរូបខ្ញុំផ្ទាល់ក្នុងការទទួលបាននូវបទពិសោធន៍ក្នុងភាពជាអ្នកដឹកនាំសម្រាប់ខ្លួនឯង និង យុវជនជំនាន់ថ្មី ព្រមទាំងចំណេះដឹងថ្មីៗសម្រាប់អនាគតរបស់យើង ហើយដើម្បីចង់សាកល្បងសមត្ថភាពជាអ្នកដឹកនាំរបស់ខ្លួនជាមួយ យុវជនកម្ពុជាដទៃទៀតដែរ ពិសេសប្រសិនបើជាប់ជាយុវជនឆ្នើម ខ្ញុំនឹងមានលទ្ធភាពទស្សនកិច្ចសិក្សានៅបរទេស ដែលជាឱកាសដ៏ពេសេបំផុតសម្រាប់ខ្ញុំ ដើម្បីស្វែងយល់ពីអ្វីថ្មីៗ និង ល្អៗពីទីនោះមកធ្វើជាគំរូដើម្បីចូលរួមអភិវឌ្ឍប្រទេសកម្ពុជាតាមលទ្ធភាពដែលយុវជនម្នាក់អាចធ្វើទៅបាន ។
អំពីភាពជាអ្នកដឹកនាំ ៖
វាមិនមែនជាការងាយស្រួលទេដើម្បីក្លាយជាមេដឹកនាំល្អម្នាក់ គឺមានន័យថា មេដឹកនាំល្អម្នាក់ត្រូវមានគុណសម្បត្តិច្រើនយ៉ាង ទីមួយ គេបានឆ្លងកាត់នូវការបណ្ដុះបណ្ដាលត្រឹមត្រូវនូវមុខវិជ្ជាទាក់ទងនឹងការដឹកនាំ គឺ ស្ថាប័នរដ្ឋ ឬ ឯកជននានាដែលមានការទទួលស្គាល់ ទីពីរ គេគួរតែមានបទពិសោធន៍ច្រើន ចូលរួមសកម្មភាពទាក់ទងនឹងការដឹកនាំ និង សកម្មភាពផ្សេងៗទៀតនៅក្នុងសង្គម ទីបី គេត្រូវតែជាមនុស្សពិសេសដែលមិនមែនជាអត្តទត្ថបុគ្គល គឺត្រូវធ្វើអ្វីៗដើម្បីបំរើផលប្រយោជន៍រួម ហើយក៏ត្រូវទទួលស្ដាប់នូវរាល់យោបល់របស់កូនក្រុម និង ជជែកវែកញែករកដំនោះស្រាយជាមួយពួកគេ មុននឹងធ្វើរាល់ការសម្រេចចិត្តដែលអាចប៉ះពាល់ដល់ក្រុមទាំងមូល ឬ ក៏ប្រទេសជាតិ ចុងបញ្ចប់ គេគួរជាអ្នកមានសុភវិនិច្ឆ័យល្អ និង អាចបត់បែនគ្រប់កាលៈទេសៈដើម្បីបញ្ចៀសរាល់ផលលំបាកផ្សេងៗដល់ក្រុម ពិសេសដឹងទុក្ខធុរៈអ្នកដែលស្ថិតក្រោមការដឹកនាំរបស់ខ្លួន ។
អំពីបទពិសោធន៍ ៖
ចំពោះបទពិសោធន៍គឺខ្ញុំមានតិចបំផុត តែទោះជាយ៉ាងណាខ្ញុំតែងតែធ្វើជាអ្នកដឹកនាំក្រុមក្នុងកិច្ចការនៅឯសាសាភាសាអង់គ្លេស ព្រោះខ្ញុំតែងមានចំនាត់ថ្នាក់ល្អក្នុងថ្នាក់ ខ្ញុំរមែងយកចិត្តទុកដាក់ និង ស្វែងយល់ពីរាល់សកម្មភាពរបស់អ្នកដឹកនាំតាំងពីថ្នាក់តូចដល់ថ្នាក់ធំ ដូចជា ប្រធានថ្នាក់ ប្រធានសមាគមនិស្សិត ប្រធានគណបក្ស រដ្ឋមន្ត្រី និង នាយករដ្ឋមន្ត្រី … លើសពីនេះ ខ្ញុំតែងព្យាយាមអានសៀវភៅទាក់ទងនឹងអ្នកប្រាជ្ញវិទូ និង អ្នកដឹកនាំល្បីៗលើពិភពលោក ដើម្បីដុសខាត់ខ្លួនឯងឲ្យមានសមត្ថភាព ឬ ក៏អាចក្លាយខ្លួនជាអ្នកដឹកនាំដ៏ល្អម្នាក់ទៅថ្ងៃអនាគត ។ កាលពីខ្ញុំនៅជាសិស្សខ្ញុំតែងបានចូលជាបច្ច័យសម្រាប់ការសាងសង់អគារសាលា ឬ សំណង់ផ្សេងៗក្នុងវត្ត ជាមួយសាលា ឬ ក្រុមគ្រួសារខ្ញុំតាមលទ្ធភាពដែលខ្ញុំមាន ។ ពេលក្លាយជានិស្សិត ខ្ញុំបានចូលរួមបកប្រែដោយស្ម័គ្រចិត្តឲ្យក្រុមគ្រូពេទ្យបរទេសដែលមកព្យាបាលដោយមិនយកថវិកាពីប្រជាជនក្រីក្រ ហើយខ្ញុំតែងផ្ដល់ជាថវិកា ឬ ទិញឧបករណ៍សិក្សាសម្រាប់ក្មេងៗតាមខេត្តផងដែរ ពិសេសឥឡូវខ្ញុំក៏ជាគ្រួបង្រៀនបំប៉នភាសាអង់គ្លេស ហើយខ្ញុំរីករាយជាខ្លាំងព្រោះខ្ញុំអាចរំលែកចំណេះដឹងទៅក្មេងជំនាន់ក្រោយ ។
ប្រសិនបើជាប់ជាយុវជនឆ្នើម ៖
ខ្ញុំនឹងមានគំរោងដែលត្រូវធ្វើបន្តទៀតគឺ ត្រូវបន្តការខិតខំរៀនសូត្រទាំងនៅមហាវិទ្យាល័យវេជ្ជសាស្ត្រ និង អង់គ្លេសដើម្បីធ្វើខ្លួនជាយុវជនឆ្នើម និង ជាគំរូដ៏ល្អម្នាក់សម្រាប់យុវជនជំនាន់ក្រោយ ហើយនឹងបន្តចូលរួមសកម្មភាពផ្សេងៗក្នុងការងារសង្គម ដើម្បីអភិវឌ្ឍប្រទេសជាតិដោយបូជាទាំងកំលាំងកាយចិត្ត និង ថវិកាទៅតាមលទ្ធភាពផ្ទាល់ខ្លួន ពិសេសគំរោងដ៏ធំមួយ គឺ ខិតខំរិះរកនូវគំនិតថ្មីៗក្នុងគោលបំណងបណ្ដុះបណ្ដាលយុវជនកម្ពុជា ឲ្យមានសមត្ថភាពគ្រប់គ្រាន់រៀងៗខ្លួនដើម្បីយើងជាយុវជនខ្មែរទាំងអស់គ្នាអាចចូលរួមពួតដៃគ្នាក្នុងការជួយកសាងសង្គមជាតិ ។
អំពីទស្សនៈវិស័យ ៖
ខ្ញុំបាទមិនទាន់ពេញចិត្តនឹងស្ថានភាពយុវជនកម្ពុជាក្នុងពេលបច្ចុប្បន្ន ដោយយោងទៅតាមការសង្កេតខ្លះៗរបស់ខ្ញុំ គឺនៅមានយុវជនមួយចំនួនតូច ដែលនៅបន្តប្រព្រឹត្តល្បែងស៊ីសង និង អំពើពាលាអាវាសែផ្សេងៗដែលប៉ះពាល់ដល់សន្តិសុខ សន្តិភាព និង កិត្តិនាមប្រទេសជាតិ ។ សម្រាប់កូនអ្នកមានយសសក្តិខ្លះ ចាយលុយហួសប្រមាណសម្រាប់តែប្រយោជន៍ផ្ទាល់ខ្លួន និង មិនចូលរួមលុយទាំងនោះក្នុងសកម្មភាពសប្បុរសធម៌ផ្សេងៗក្នុងសង្គម ហើយយុវជនក្រីក្រមួយចំនួនមិនបានទទួលការបណ្ដុះបណ្ដាលរៀនសូត្រដោយបញ្ហាថវិកា រីឯ យុវជនខ្លះខិតខំរៀនសូត្រឲ្យពូកែ និង ដើម្បីរករបរចិញ្ចឹមជីវិតដើម្បីអនាគតរបស់ពួកគេទៅថ្ងៃខាងមុខ ដូច្នេះយុវជនខ្មែរត្រូវតែខិតខំរៀនសូត្រ និង ដុសខាត់ចិត្តគំនិតខ្លួនឲ្យចេះស្រលាញ់ប្រទេសជាតិដោយគិតប្រយោជន៍រួមជាពិសេស និង ត្រូវធ្វើជាគំរូល្អសម្រាប់កូនខ្មែរជំនាន់ក្រោយ ហើយខ្ញុំតែងតែជឿជាក់យុវជនដែលមានចិត្តអង់អាច ក្លាហាន មោះមុត ក្លៀវក្លា និង ពុះពារគ្រប់ឧបសគ្គហើយក៏យល់ដឹងពីអត្ថប្រយោជន៍នៃវត្តមានរបស់ពួកគេដើម្បីចូលរួមអភិវឌ្ឍប្រទេសជាតិឲ្យកាន់តែប្រសើរឡើងដូចឃ្លាមួយដែលពោលថា ” យុវជនជាសសរទ្រូងប្រទេសជាតិ ” ជាបញ្ចប់ ខ្ញុំបាទសង្ឃឹមថា រាល់អង្គការទាក់ទងនឹងយុវជនក្នុងប្រទេសកម្ពុជានឹងត្រូវបន្តបានការជ្រោមជ្រែងពីអង្គការក្រៅរដ្ឋាភិបាល ពិសេសគឺរដ្ឋាភិបាលផ្ទាល់មានការផ្ដល់ជាថវិកា និង ការលើកទឹកចិត្តដល់អង្គការទាំងនោះដើម្បីធ្វើឲ្យប្រសើរឡើងនៃស្ថានភាពរបស់យុវជនក្នុងប្រទេសកម្ពុជា ។

ទំលាក់ មួយវិចារ » | បេក្ខជន | តំណភ្ជាប់អចិន្ត្រៃ
បានដាក់ប្រកាស ដោយ doubleu

ហេង សុជាតា

ខែ មករា 27, 2007

សុជាតា មានអាយុ២១ឆ្នាំ មានស្រុកកំនើតនៅក្រុងភ្នំពេញ សព្វថ្ងៃជានិស្សិតឆ្នាំទី៤នៅសាកលវិទ្យាល័យភូមិន្ទភ្នំពេញ និងសាកលវិទ្យាជាតិគ្រប់គ្រង ។

មតិរបស់ សុជាតា
ខ្ញុំគិតថាកម្មវិធីនេះនឹងផ្ដល់ឱកាសមាសដល់ខ្ញុំក្នុងការប្រកួតប្រជែងដើម្បីទទួលបាននូវជ័យលាភីជាយុវជនឆ្នើម។ ខ្ញុំក៏ជឿទៀតថានៅក្នុងដំនាក់ការនៃការប្រកួតប្រជែងក៏ផ្ដល់អោយខ្ញុំនូវបទពិ សោធន៏និងចំនេះដឹងល្អៗទៅថ្ងៃក្រោយទៀត។ម្យ៉ាងវិញទៀតនោះនៅពេលដែលខ្ញុំ ទទួលបានជ័យលាភីជាយុវជនឆ្នើមខ្ញុំនឹងក្លាយទៅជាអ្នកដឹកនាំមួយរូបហើយខ្ញុំ អាចយកបទពិសោធន៍នេះទៅធ្វើការក៏ដូចជាបង្កើតគំរោងផ្សេងៗដើម្បីដឹកនាំយុវជនរឺក្មេងៗជំនាន់ក្រោយទាំងឡាយដើម្បីដើរផ្លូវល្អខិតខំរៀនសូត្រដើម្បីរួមសាម្គីកសាងប្រទេសទាំងអស់គ្នា។ជាងនេះទៅទៀតនោះខ្លួន ខ្ញុំផ្ទាល់មានចរិកចូលចិត្តដឹកនាំនិងចាត់ចែងមិនថាក្នុងចំនោមមិត្តភក្តិរឺក៏នៅ ក្នុងថ្នាក់រៀននោះទេគឺខ្ញុំតែងតែផ្ដួចផ្ដើមគំនិតនិងនាំគ្នាទៅធ្វើការងារអ្វី មួយជានិច្ច។មួយទៀតនោះខ្ញុំគឺជាមនុស្សចូលចិត្តទទួលនូវគំនិតថ្មីៗនិងចូល ចិត្តការប្រកួតប្រជែងដើម្បីអភិវឌ្ឍន៍ក៏ដូចជាការទំនាក់ទំនងជាមួយមនុស្សផ្សេងៗ ទៀតផងដែរ។

គុណសម្បត្តិរបស់អ្នកដឹកនាំ៖
មេដឹកនាំល្អម្នាក់គឺជាអ្នកមានសមត្ថភាពដើម្បីញុំងទឹកចិត្ត មនុស្សទាំងឡាយដោយភាពប្ដូរផ្ដាច់ប្រកបដោយសុឆន្ទៈនិងដោយស្ម័គ្រចិត្តតស៊ូដើម្បីជោគជ័យឬសំរេចដល់គោលដៅ។
មេដឹកនាំល្អគឺជាដែលប្តូរផ្តាច់ជាគំរូដល់អ្នកដទៃ ជាអ្នកដែលមាន ទំនាក់ទំនងល្អជាមួយអ្នកនៅជុំវិញខ្លួនជាមនុស្សដែលមានឥទ្ធិពលដែលអ្នកដទែគោរពនិងស្ដាប់តាមនិងជាអ្នកដែលមានសមត្ថភាពបញ្ចុះបញ្ចូលអ្នកដទៃអោយធ្វើនូវការងារ ផ្សេងៗ ។

បទពិសោធន៍ផ្ទាល់ខ្លួន៖
នៅក្នុងឆ្នាំ២០០២ខ្ញុំបានចូលរួមក្នុងកម្មវិធីHigh School Exchange Program ដែលឧបត្ថម្ភដោយអង្គការAFS ជប៉ុនដែលនៅក្នុងរយៈពេល មួយខែនៅប្រទេសជប៉ុនខ្ញុំទទួលការបង្ហាត់បង្រានអោយក្លាយទៅជាអ្នកដឹកនាំ។
នៅក្នុងឆ្នាំ២០០៤ ខ្ញុំបានចូលរួមកម្មវិធី Pan-Asian Youth Leadership Summit នៅទីក្រុងHiroshima ប្រទេសជប៉ុនដែលនៅពេលនោះខ្ញុំគឺជាអ្នកតំនាងទៅពិភាក្សាអំពីបញ្ហាសង្គមទាំងឡាយដែលទាក់ទងជាមួយនឹងគោលដៅអភិវឌ្ឍន៍សហសវត្សន៍(MDGs) ។នៅពេលដែលត្រឡប់មកវិញខ្ញុំធា្លប់ដឹកនាំនិសិ្សតមួយក្រុមតូចទៅចូលរួមក្បួនហែរដែលរៀបចំ ដោយអង្គការUNDP ដើម្បីដាស់ស្មារតីប្រជាជនអោយចូលរួមជួយកាត់បន្ថយភាពក្រីក្រ ទាំងអស់គ្នា។

ប្រសិនបើជាប់ជាយុវជនឆ្នើម៖
បើសិនជាខ្ញុំទទួលបានជ័យលាភីសំរាប់ការប្រកួតប្រជែងនេះខ្ញុំនឹងប្រើប្រាស់បទ ពិសោធន៍និងចំនេះដឹងដែលទទួលបានពីការប្រកួតប្រជែងនេះទៅប្រើប្រាស់អោយមានតំលៃ បំផុត គឺខ្ញុំនឹងចូលរួមកម្មវិធីនិងសកម្មភាពផ្សេងៗនៅក្នុងសង្គមដើម្បីអភិវឌ្ឍន៍ សង្គមក៏ដូចជាប្រទេសជាតិ ។ក្នុងនាមខ្ញុំជាយុវជនម្នាក់ខ្ញុំគឺជារលកក្រោយដែលជា អ្នកកសាងប្រទេសដូចនេះខ្ញុំនឹងប្រើសក្តានុពលជាអ្នកដឹកនាំរបស់ខ្ញុំណែនាំ យុវវ័យដែលមានវ័យស្របាលខ្ញុំនិងវ័យជំនាន់ក្រោយអោយស្គាល់ពីតំលៃខ្លួននិង ពេលវេលារបស់ពួកគេ អោយធ្វើអ្វីដែលមានប្រយោជន៍និងជួយដល់អ្នកដទៃដែលមិនមានឱ កាសច្រើនរួមទាំងការរៀនសូត្រអោយមានឱកាសនិងរស់នៅរីករាយក្នុងសង្គម ។ខ្ញុំក៏ រំពឹងថាខ្ញុំនឹងអាចជួយប្រជាជនក្នុងការអប់រំក៏ដូចជាចំនេះដឹងផ្សេងៗដើម្បីអោយ ពួកគាត់ (ជាពិសេសអ្នកនៅតាមជនបទ)អោយជៀសផុតពីភាពក្រីក្រ។

អំពីទស្សនៈវិស័យ៖
តាមដែលខ្ញុំដឹងបញ្ហាចំបងដែលយុវជនកម្ពុជាជួបប្រទះគឺភាពអត់ការងារធ្វើ។បញ្ហានេះ កើតមានជាពិសេសនៅតាមទីជនបទដែលពួកគាត់ពុំបានរៀនសូត្រជ្រៅជ្រះដោយសារតែភាព ក្រីក្រ។ចំពោះអ្នកដែលបានរៀនសូត្រក៏ដូចគ្នាដែរក្នុងការរកការងារធ្វើ ។ចំពោះបញ្ហា ឯទៀតនោះគឺយុវជនមិនសូវយកចិត្តទុកដាក់ក្នុងការរៀនសូត្រប្រើអំពើហិង្សានិង ការសេពគ្រឿងញៀនផ្សេងៗ ។

ក្នុងនាមខ្ញុំជាយុវជនម្នាក់ខ្ញុំមានការព្រួយបារម្ភយ៉ាងខ្លាំងពីព្រោះថាយុវជនគឺជាអ្នកជំនាន់ក្រោយដែលនឹងអភិវឌ្ឍន៍ប្រទេសជាតិ ។ខ្ញុំយល់ថាយុវជនគួរតែទទួល នូវការបង្ហាត់បង្រៀនជាចំនាញផ្សេងៗជាពិសេសយុវជនដែលពុំសូវបានរៀនសូត្រ ធ្វើដូច នេះទើបគាត់អាចចិញ្ចឹមជីវិតគាត់បាន ។ម្យ៉ាងវិញទៀតនៅតាមសាលានានាគួរតែមានក្លឹប ដែលបើកចំហអោយសិស្សនិស្សិតអាចចូលរួមពិភាក្សាទៅលើប្រធានបទអប់រំអ្វីមួយ ដើម្បីបង្ហាត់បង្រៀននិងដាស់តឿនពួកគេអោយដើរផ្លូវល្អនិងយល់ពីសង្គម ។

ទំលាក់ មួយវិចារ » | បេក្ខជន | តំណភ្ជាប់អចិន្ត្រៃ
បានដាក់ប្រកាស ដោយ doubleu

ស៊ន សារ៉ាត

ខែ មករា 27, 2007

សារ៉ាតមានអាយុ២៤ឆ្នាំ និងមានស្រុកកំនើតនៅខេត្តកំពង់ស្ពឺ សព្វថ្ងៃរស់នៅក្នុងក្រុងភ្នំពេញ ។ សារ៉ាតមានមុខងារជាអគ្គលេខាធិការនៅក្នុងចលនានិស្សិតដើម្បីលទ្ធិប្រជាធិបតេយ្យ ។
មតិរបស់សារ៉ាត៖
រាល់សកម្មភាពរបស់យុវជនទាំងអស់ពិតជាសំខាន់ណាស់ក្នុងការអភិវឌ្ឍសង្គម ដើម្បីពង្រឹងភាពក្លាហាន និងសមត្ថភាពព្រមទាំងបង្កើតស្នាដៃនិងបង្ហាញពីទេពកោសល្យពីធម្មជាតិសម្រាប់ខ្លួនឯងកាន់តែប្រសើរ ។ សកម្មភាពនៃការចូលរួម គឺដើម្បីបំផុសគំនិតស្មារតីនិងជំរុញឆន្ទះយុវជនក្នុងប្រព័ន្ធអប់រំនិងក្រៅប្រព័ន្ធអប់រំឲ្យឃើញពីអត្ថប្រយោជន៍និងតួនាទីរបស់ខ្លួនក្នុងសង្គមឲ្យទូលំទូលាយ ។ ការប្រកួតប្រជែងពិតជាបង្កើនចំនេះដឹងថ្មីៗ មានបទពិសោធន៍ និង យុទ្ធសាស្ត្រល្អៗព្រមទាំងទំនាក់ទំនងល្អរវាងបណ្ដាក្រុមយុវជនពីគ្រប់មជ្ឈដ្ឋាន ឆ្លុះបញ្ចាំងពីការចូលរួមនៃកំលាំងយុវជនដ៏ធំសម្បើមផ្នែកបញ្ញាស្មារតី និង សុខភាព រាងកាយមាំមួនជាកំលាំងចលករ ។ កត្តាទាំងនេះហើយដែលជំរុញរូបខ្ញុំបាទចូលរួមប្រកួតប្រជែងដើម្បីក្លាយជាយុវជនឆ្នើមមួយរូប ក្នុងការកសាងស្នាដៃ និង កិត្តិយស និងដើម្បីបង្ហាញពីសមត្ថភាពនិង បទពិសោធន៍ដែលធ្លាប់មានកន្លងមក ឈានដល់ការប្រកួតប្រជែងនេះ ពិសេសគឺរៀបចំគោលដៅឲ្យសម្រេចជោគជ័យក្នុងសមត្ថភាពជាអ្នកដឹកនាំវ័យក្មេង សម្រាប់ពេលអនាគត ដ៏ប្រសើររុងរឿង។
ភាពជាអ្នកដឹកនាំ៖
គុណសម្បត្តិនិងលក្ខណៈសម្បត្តិរបស់អ្នកដឹកនាំត្រូវប្រកាន់ខ្ជាប់រួមមាន៖
ត្រូវតែមានសមត្ថភាពខ្ពស់ដើម្បីអោយសំរេចគោលដៅពិសេសការសំរេចចិត្តដ៏ត្រឹមត្រូវ។
ត្រូវចេះរៀបចំផែនការ មានគោលដៅទិសដៅជាក់លាក់សំរេចលទ្ធិផលគួរជាទីពេញចិត្ត។
ត្រូវមានគុណធម៌ សីលធម៌និងសុជីវធម៌ខ្ពស់មានន័យថាភាពជាគំរូគេចំពោះអ្នកដទៃ។
ត្រូវហ៊ានក្លាហានស្ដាប់ការតិះទៀនដើម្បីស្ថាបនា។
ត្រូវចេះបែងចែកការងារនិងអំណាចព្រមទាំងការប្រគល់ភារកិច្ចទៅតាមតួនាទីត្រឹមត្រូវ។
មានទឹកចិត្តទូលាយនិងការទទួលខុសត្រូវខ្ពស់រាល់ទង្វើនៃការដឹកនាំ។
ត្រូវស្គាល់ខ្លួនឯងនិងអ្នកដទៃជុំវិញខ្លួន។
មានទេពកោសល្យផ្ទាល់ខ្លួននិងបង្កើនប្រជាប្រិយភាពរបស់ខ្លួន។
បទពិសោធន៍ផ្ទាល់ខ្លួន៖
ធ្លាប់ជាប្រធានថ្នាក់តាំងពីអនុវិទ្យាល័យរហូតដល់ថ្នាក់មហាវិទ្យាល័យ ក្នុងការគ្រប់គ្រងនិងដឹកនាំសិស្សនិស្សិតនិងយុវជនមានស្ថានភាពនិងសណ្ដាប់ធ្នាប់យ៉ាងល្អប្រសើរណាស់។
ជាគ្រូបង្រៀនភាសាអង់គ្លេសតាំងពីឆ្នាំ២០០៣រហូតដល់បច្ចុប្បន្ន។
ជាយុវជនស្ម័គ្រផ្នែកសង្កេតការណ៍នៅឯរដ្ឋសភាជាតិនៃអង្គការYCC.
មានតួនាទីញជាអ្នកគ្រប់គ្រងបណ្ដាញយុវជនស្ម័គ្រចិត្តរបស់(SMD)។
ឆ្នាំ២០០៦បានជាប់ឆ្នោតជ្រើសរើសជាប់ជាអគ្គលេខាធិការនៅសមាគមចលនានិស្សិតដើម្បីលទ្ធិប្រជាធិបតេយ្យ(SMD)។ដឹកនាំក្រុមយុវជនចូលរួមប្រជុំនិងសកម្មភាពសង្គមបានច្រើនិងយុទ្ធនាការ។
ជាអ្នកគ្រប់គ្រងកម្មវិធីនិងសំរបសំរួលកម្មវិធីនៃវគ្គបណ្ដុះបណ្ដាលព្រមទាំងរៀបចំរបាយការណ៍ក្រោយបញ្ចប់វគ្គនិមួយៗ។
នៅថ្ងៃទី២៣-៣៤ ខែធ្នឆ្នាំ២០០៦ដឹកនាំក្រុមនិស្សិតនិងព្រះសង្ឃទស្សនៈកិច្ចព្រំដែនខ្មែរថៃ។
ប្រសិនបើជាប់ជ័យលាភី៖
រៀបចំកសាងស្នាដៃនិងពង្រឹងសមត្ថភាពផ្ទាល់ខ្លួនបន្ថែមទៀតអោយកាន់តែខ្លាំង។
បន្ដការដឹកនាំក្រុមបណ្ដាញយុវជនអោយកាន់តែរឹងមាំនិងបំផុសឆន្ទៈនៃស្មារតីយុវជនអោយមានការចូលរួមកាន់ច្រើនឡើង។
ការពង្រីកបណ្ដាញយុវជននៅតាមសមាគមរបស់ខ្ញុំបាទអោយបានច្រើនពីបណ្ដាសកលវិទ្យាល័យនិងមហាវិទ្យាល័យ ព្រមទាំងមានរបាយការណ៍ជាក់លាក់និងប្រសិទ្ធិភាពខ្ពស់ដើម្បីជំរុញលើកទឹកចិត្តនិងលើកកំពស់ស្មារតីរបស់យុវជន យ៉ាងពេញទំហឹង។
ឆ្លុះបញ្ចាំងអំពីស្នាដៃយុវជនពិតៗតាមរយៈការចងក្រងជាអត្ថបទតាមវេបសាយនិងបច្ចេកទេសផ្សេងៗសំរាប់យុវជន ជំនាន់ក្រោយ។
ជារួមមកខ្ញុំនឹងយកលទ្ធផលដែលល្អៗពីការប្រកួតប្រជែងនេះទៅពង្រឹងសមត្ថភាពផ្ទាល់ខ្លួនអោយកាន់តែរឹងមាំ និងរៀបចំសកម្មភាពនៃការដឹកនាំយុវជនក្នុងសមាគមរបស់ខ្លួនអោយមានប្រជាប្រិយភាព។ទន្ទឹមនិងនោះ បំផុសគំនិតស្មារតីយុវជនអោយមានភាពក្លាហាននិងជឿជាក់ដើម្បីក្លាយខ្លួនជាយុវជនគំរូក្នុងការដឹកនាំ យុវជនដទៃទៀតអោយសំរេចគោលដៅឈានទៅរកការលើកស្ទួយនូវគោលការណ៍អភិវឌ្ឍន៍យុវជនជាតិទាំងមូល។
អំពីទស្សនៈវិស័យ៖
តាមការសង្កេតឃើញពីស្ថានភាពយុវជននៅកម្ពុជាគឺមានកំរឹតនៅឡើយទាំងការបែងចែកជាច្រើន ក្រុមស្របតាមបរិយាកាសសង្គមដែលផ្ដល់អោយ។បញ្ហាដែលយុវជនមួយចំនួនធំកំពុងជួបប្រទះ គឺភាពគ្មានការងារធ្វើរបស់យុវជននិស្សិតក្រោយបញ្ចប់ការសិក្សានិងមួយចំនួនទៀតទំនេរច្រើនឈាន ទៅដល់ការវង្វេងនិងល្បែងស៊ីសងនិងការសេពគ្រឿងញៀនកាន់តែច្រើនឡើងៗ។ដោយគ្មានការ យកចិត្តទុកដាក់របស់អាជ្ញាធរនិងភាពមិនទទួលខុសត្រូវរបស់រដ្ឋាភិបាល។
ដើម្បីអោយស្ថានភាពកាន់តែប្រសើរឡើងវិញត្រូវរកទីផ្សារការងារ រដ្ឋាភិបាលត្រូវតែលើកស្ទួយនូវគោលការណ៍អភិវឌ្ឍន៍យុវជនជាកត្តាចំបង។គឺធ្វើយ៉ាងណាអោយ យុវជនដឹងពីតួនាទីរបស់ខ្លួនក្នុងសង្គមដើម្បីជៀសផុតពីអំពើអបាយមុខបង្កើតក្រុមការងារស្ម័គ្រតាមសមាគមបានច្រើន។
ខ្ញុំបាទសង្ឃឹមយ៉ាងជឿជាក់ថាស្ថានភាពយុវជនកាន់តែប្រសើរឡើងវិញបើកាលណារដ្ឋាភិបាលចាត់វិធាន ការណាមួយដ៏ត្រឹមត្រូវហើយយកចិត្តទុកដាក់ទៅលើយុវជននោះពិតជាមានការចូលរួមក្នុង សង្គមនយោបាយរបស់យុវជនយ៉ាងប្រសើរ។

ទំលាក់ មួយវិចារ » | បេក្ខជន | តំណភ្ជាប់អចិន្ត្រៃ
បានដាក់ប្រកាស ដោយ doubleu

ប៉ុន ពិសី

ខែ មករា 27, 2007

ពិសី ពិសីមានអាយុ២៣ឆ្នាំ មានស្រុកកំនើតនៅខេត្តព្រៃវែង សព្វថ្ងៃជានិស្សិតឆ្នាំទី៣ នៅសាកលវិទ្យាល័យអាស៊ាន ។
មតិរបស់កញ្ញាប៉ុនពិសី៖
កត្តាដែលជំរុញអោយរូបខ្ញុំក្នុងការលើកទឹកចិត្ដដើម្បីចូលរួមប្រកួតប្រជែងគឺ ៖
មានជំនឿទុកចិត្ដលើអង្គការ(YCC)ព្រោះថាអង្គការនេះគឺជួយលើកកំពស់ ដល់ក៏ដូចជាបណ្ដុះបណ្ដាលនូវចំនេះជាច្រើនដែលស្ដីអំពីសង្គម អភិបាលកិច្ចល្អនិងលិទ្ធិប្រជាធិបតេយ្យទៅដល់យុវជនយុវនារី ខ្មែរដែលមានបំណងចង់បង្កើនចំនេះដឹង។
សមត្ថភាព៖គឺជាឱកាសមួយដែលផ្ដល់ដល់យុវជនទាំងអស់ដែលមានសមត្ថភាពនិងបញ្ចេញនូវចំនេះដឹងខ្លួន។
សង្គម៖ដោយសារតែសង្គមជាតិបច្ចុប្បន្នកំពុងធ្វើការអភិវឌ្ឍផ្នែកធនធានមនុស្សដូច្នេះយើងគួរតែបង្ហាញនិងបញ្ចេញស្នាដៃថាកូនខ្មែរក៏សមត្ថភាពមិនចាញ់ប្រទេសជិតខាង។
ឪពុកម្ដាយ បងប្អូននិងមិត្តភក្ដិ ៖ពួកគាត់បានផ្ដល់មតិនិងជួយ ជាកំលាំងចិត្ដ។
ភាពជាអ្នកដឹកនាំ៖
ចំពោះរូបខ្ញុំវិញមេដឹកនាំដ៏ល្អគឺគួរមានគុណសម្បត្តិដូចខាង ក្រោម៖
សមត្ថភាព៖វាជាកត្តាចំបងមួយដែលមិនអាចខ្វះបានដើម្បីដឹកនាំការងារឬក្រុមអ្វីមួយចាំបាច់ត្រូវមានសមត្ថភាពខ្ពស់ទើបអ្នកក្រោមបង្គាប់ស្ដាប់។
ចំនេះដឹង ៖នៅពេលដែលអ្នកដឹកនាំមានចំនេះដឹងជ្រៅជ្រះហើយធ្វើអោយការគិតរបស់គាត់ប្រកបដោយភាពត្រឹមត្រូវនិងច្បាស់លាស់។
ឈ្លាសវៃនិងរហ័សរហួន ៖អ្នកដឹកនាំបើមិនឈ្លាសវៃនិងដឹកនាំអោយមានភាពរហ័សនិងចេះបត់បែនតាមកាលៈទេសៈ។
ម៉ត់ចត់មិនកោងកាច៖អ្នកដឹកនាំមិនត្រូវធ្វើការអោយផុតពីដៃនោះទេ។
បទពិសោធន៍ផ្ទាល់ខ្លួន៖
ចំពោះបទពិសោធន៍ក្នុងការចូលរួមក៏ដូចជាអ្នកដឹកនាំក្នុងសង្គមគឺ៖
ខ្ញុំធ្លាប់បានធ្វើការងារមួយបំរើសង្គមក្នុងអង្គការ(WOMEN)អស់ រយៈពេលជាងមួយឆ្នាំក្នុងនោះខ្ញុំធ្វើជាមិត្តអប់រំមិត្តហើយពេលខ្លះខ្ញុំបានដឹកនាំក្មេងជាក្រុមដើម្បីសិក្សាអំពីបញ្ហាសុខភាពបន្ដពូជជារៀងរាល់ខែហើយបានចូលរួមសិក្សាសិទ្ធិមនុស្សចូលរួមបញ្ចេញមតិយោបល់ក្នុងនាមជាប្រជាពលរដ្ឋពេលដែលសមាគមមានកិច្ចប្រជុំ។និងខ្ញុំក៏ជាអ្នកដឹកនាំក្នុងការសំដែងរឿងខ្លីៗដឹកនាំក្រុមចំរៀងនិងរៀបចំកម្មវិធីដូចកម្មវិធីគ្រឹស្គស្មាក់(X’max)ហើយធ្លាប់ធ្វើជាអ្នកសំរបសំរួលក្នុងកម្មវិធីលែងល្បែងប្រជាប្រិយក្នុងឱកាសបុណ្រចូលឆ្នាំខ្មែរប្រពៃណីជាតិនិងដឹកនាំមនុស្សមួយក្រុមក្នុងការធ្វើព្យុះហយាត្រាការប្រយុទ្ធប្រឆាំងនិងជំងឺអេដស៍។
ប្រសិនបើជាប់ជ័យលាភី៖
ប្រសិនបើខ្ញុំទទួលបានជ័យលាភីសំរាប់ការប្រកួតប្រជែងនេះខ្ញុំនិងមានគំរោងថា៖ ខ្ញុំនិងទៅដំនើរកំសាន្តនៅបរទេសដែលថាកម្មវិធីតំរូវសំរាប់បេក្ខជនដែលទទួលបានជ័យជំនះសំរាប់ការប្រកួតប្រជែងនេះក្នុងខណះនេះដែរខ្ញុំនិងខិតខំស្វែងយល់អំពីប្រទេសគេស្វែងរកចំនុចណាដែលល្អនិងអភិវឌ្ឍពីទីនោះមកអនុវត្តន៍ប្រទេសខ្មែរជាពិសេសលើផ្នែកនៃការចូលរួមក៏ដូចជាសកម្មភាពរបស់យុវជនដែលរស់នៅទីនោះ។ហើយថវិការដែលបានមកខ្ញុំនិងយកមកផ្គត់ផ្គង់លើការរៀនសូត្ររបស់ខ្ញុំដែលសព្វថ្ងៃនេះកំពុងតែជួបប្រទះនិងវិបត្តិហិរញ្ញវត្ថនៅក្នុងគ្រួសារជាខ្លាំងនិងមួយចំនែកទៀតខ្ញុំនិងផ្គត់ផ្គង់ទៅដល់អង្គការ(YCC)ដើម្បីរៀបចំវគ្គបណ្ដុះបណ្ដាលថ្មីៗសំរាប់យុវជនអោយស្គាល់់ពីតំលៃខ្លួនឯងនិងជួយបង្កើនសកម្មភាពរបស់ពួកគេក្នុងការចូលរួមរាល់សកម្មភាពផ្សេងៗដែលផ្ដល់អត្ថប្រយោជន៍សំរាប់សង្គមជាតិនិងការអភិវឌ្ឍន៍ដើម្បីក្លាយខ្លួនទៅជាសរសទ្រូងនៃប្រទេសពីព្រោះថាយុវជនគឺប្រៀបបានទៅនិងកូនសោរសំរាប់ចាក់ឆ្ពោះទៅកាន់ភាពរុងរឿង។
អំពីទស្សនៈវិស័យ៖
តាមការសង្កេតរបស់ខ្ញុំឃើញថាយុវជនកម្ពុជានាពេលបច្ចុប្បន្ននេះគឺកំពុងតែទទួលនូវប្បធម៌បរទេសជាច្រើនដែលជាកត្តាមួយដែលធ្វើអោយវប្បធម៌ខ្មែរបាត់បង់បន្ដិចម្ដងៗ។ហើយមួយចំនួនគឺកំពុងតែហក់លោតនិងប្រព្រឹត្តអំពើមិនគួរគប្បីខុសនិងច្បាប់មិនខិតខំរៀនសូត្រមិនស្គាល់ពីតំលៃខ្លួននិងសង្គមជាតិមិនស្ដាប់បង្គាប់និងការទូន្មានរបស់ឪពយកម្ដាយដែលជាមូលហេតុនាំអោយសង្គមគ្មានសណ្ដាប់ធ្នាប់និងសន្ដិសុខដោយសារការសេពគ្រឿងញៀន ល្បែងស៊ីសង។មានយុវជនមួយចំនួនទៀតពួកគាត់មានចំនេះដឹងនិងសមត្ថភាពហើយក៏ប៉ុន្ដែគាត់មិនបានយកវាប្រើអោយបានផលប្រយោជន៍ជូនសង្គមជាតិនោះទេ។ជាក់ដូចជាការប្រលងយុវជនឆ្នើមនៅពេលដែលខ្ញុំនិងផ្ដល់ពត៌មានទៅពួកគេហាក់ដូចជាមិនយល់អំពីក្នុងការបង្ហាញពីសមត្ថភាពខ្លួន។ដូចនេះដើម្បីអោយប្រទេសជាតិរុងរឿងយុវជនត្រូវតែក្លាហានក្នុងការចូលរួមរាល់សកម្មភាពដែលផ្ដល់នូវការអភិវឌ្ឍខ្លួននិងប្រទេសជាតិ។

ទំលាក់ មួយវិចារ » | បេក្ខជន | តំណភ្ជាប់អចិន្ត្រៃ
បានដាក់ប្រកាស ដោយ doubleu

អេង ហ៊ុយឡេង

ខែ មករា 27, 2007

ហ៊ុយឡេង ហ៊ុយឡេង មានអាយុ ១៨ឆ្នាំ មានស្រុកកំនើតនៅខេត្តកំពង់ចាម សព្វថ្ងៃជានិស្សិតឆ្នាំទី១នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ។
មតិរបស់អេងហ៊ុយឡេង៖
ការចង់ក្លាយខ្លួនជាអ្នកដឹកនាំដ៏ល្អម្នាក់នាសតវត្សទី២១នេះមិនមែនជាការងាយស្រួលនោះទេប៉ុន្តែក៏មិនមានន័យថាមិនអាចធ្វើបាន នោះដែល។បំណងប្រាថ្នាជាមេដឹកនាំសំខាន់ ម្នាក់ក្នុងជួររាជរដ្ឋាភិបាលដើម្បីចូលរួមក្នុងការលើកកំពស់ប្រជាធិតេយ្យនៅ កម្ពុជាអោយចាក់រឹសកាន់តែជ្រៅក្នុងស្រទាប់ប្រជាជននិងអ្នកកាន់អំនាចគឺជា បំណងប្រាថ្នាដ៏ច្បាស់របស់ខ្ញុំ។ក្នុងបុព្វហេតុការអភិវឌ្ឍសេចក្តីសុខក្សេមក្សាន្ត ក្នុងសន្តិភាពប្រកបដោយ និរន្តភាពក្នុងប្រទេស។កត្តាទាំងនេះតំរូវអោយរូ ប ខ្ញុំត្រូវតែចំនេះដឹងនិងបទពិសោធន៍ដើម្បីអាចក្លាយជាទីពឹងពាក់របស់យុវជនដូចគ្នានិងប្រជាពលរដ្ឋ។ហេតុនេះហើយ ការស្វះស្វែងរកចំនេះដឹងថ្មីៗនិងបទពិសោធន៍ ក្នុងជីវិតក្តីឬក្នុងសង្គមរស់នៅក្តីសុទ្ធតែ សំខាន់បំផុត។ទន្ទឹមនឹងនេះការទទួលបានបទពិសោធន៍ពី ឧត្ដមជនដែលមានចំនេះដឹងជ្រៅជ្រះនិងបទពិសោធន៍ច្រើនលើសលប់តាមរយៈទស្សនកិច្ចសិក្សាក៏ជាផ្នែកមួយជួយ អោយខ្ញុំនឹងអាចសំរេចបំណងប្រាថ្នា។ពោលអោយខ្លីដោយសារបំណងប្រាថ្នាយ៉ាងមោះមុតរួមនិងស្មារតីមនសិការ ជាតិនិងប្រជាជនក៏ដូចជាការចង់ទទួលបានបទពិសោធន៍ ទើបជុំរុញទឹកចិត្តដ៏ក្លៀវក្លានិងប្រកបដោយសុទិដ្ឋិនិយមអោយសំរេចចិត្ដចូលរួមការប្រកួតប្រជែងនេះ។
ភាពជាអ្នកដឹកនាំ៖
ខ្ញុំគិតថាមេដឹកនាំល្អម្នាក់ចាំបាច់ត្រូវមានលក្ខណៈ ជាច្រើនដូចជា៖
ជាមនុស្សមានកាយសម្បទារឹងមាំនិងមានស្មារតីល្អ
មានចំនេះដឹងជ្រៅជ្រះនិងសមត្ថភាពគ្រប់គ្រាន់ក្នុងការ គ្រប់គ្រងដឹកនាំសមាជិក
គោរពតាមមតិភាគច្រើនជាងប្រកាន់គំនិតអត្មានិយម អត្តនោម័ត ពោលគឺមេដឹកនាំដែលយកនិងអនុវត្តគោលការណ៍ ប្រជាធិបតេយ្យ
មានភាពប៉ិនប្រសព្វក្នុងការដោះស្រាយជំលោះរវាងសមាជិក ក្រោមបង្គាប់
ម៉ឺងម៉ាត់ចំពោះការងារគឺមានគោលការណ៍ច្បាស់លាស់និង គោរពតួនាទី
មានចិត្ដធ្ងន់គឺភាពអត់ធ្មត់ចំពោះសមាជិកនិងពួកប្រ ឆាំង
គិតប្រយោជន៍សមូហភាពជាងប្រយោជន៍ផ្ទាល់ខ្លួន ឬក្រុមខ្លួន
ពោលដោយសរុបមេដឹកនាំល្អគឺជាមនុស្សប្រកាន់ ទស្សនៈថា” ការលះបង់ខ្លួនដើម្បីបុព្វហេតុសេចក្តីសុខ សមូហភាពឬជាតិជាកាតព្វកិច្ចប្រកបដោយកិត្តិយស” ។
បទពិសោធន៍ផ្ទាល់ខ្លួន៖
សកម្មភាពនិងបទពិសោធន៍របស់ខ្ញុំក្នុងការងារសង្គម និងភាពជាអ្នកដឹកនាំ មានដូចជា៖
ចូលរួមក្នុងការដង្ហែជាក្បួនដើម្បីប្រឆាំងនឹងការរើស អើងអ្នកជំងឺអេដស៍
ជាអតីតប្រធានថ្នាក់និងសមាជិកកាកបាទក្រហមប្រចាំវិទ្យាល័យ
ជាប្រធានថ្នាក់ផ្នែកនិតិសាស្ត្រប្រចាំសកលវិទ្យាល័យ(R-U-L-E)
ជាប្រធានគំរោង” និស្សិតលេចធ្លោ” ប្រចាំសកលវិទ្យាល័យ
ចូលរួមទិវាសិទ្ធិមនុស្សក្រោមប្រធានបទ” យើងការពារសកម្មជនសិទ្ធិមនុស្ស”
ចូលរួមក្នុងកិច្ចសំណេះសំណាលរៀបចំដោយមជ្ឈ មណ្ឌលសិទ្ធិមនុស្សកម្ពុជា
ជាបេក្ខជនម្នាក់ក្នុងចំនោមសិស្សពូកែទូទាំងខេត្ដ-ក្រុងដែលត្រូវបានជ្រើសរើសដោយក្រសួងអប់រំដើម្បីចូលរួមប្រលងជ្រើសរើសសិស្សពូកែទូទាំងប្រទេសផ្នែក គណិតវិទ្យា។
ប្រសិនបើជាប់ជ័យលាភី៖
ជាកិតកិត្ដិយសបំផុតបើខ្ញុំបាទត្រូវបានជ្រើសរើសជាជ័យលាភីបន្ទាប់ពីបានសំរេចចិត្ដប្រកបដោយសុភវិនិច្ឆ័យពីសំនាក់ គណកម្មាការ។ខ្ញុំបាទមានគំរោងជាច្រើនដូចតទៅ៖
មុនការធ្វើទស្សនកិច្ចសិក្សាខ្ញុំបាទនឹងខិតខំយ៉ាង ពេញទំហឹងបន្ថែមទៀតដើម្បីរៀបចំរបាយការណ៍ស្ដីអំពីស្ថានភាពយុវជនកម្ពុជាអោយបានក្បោះក្បាយដើម្បីយកពត៌មាននេះទៅចូលរួមពិភាក្សានិងទាមទារការយកចិត្ដទុក ដាក់ពីសំនាក់អន្ដរជាតិចំពោះយុវជនខ្មែរ។
ក្នុងកំឡុងពេលទស្សនកិច្ចសិក្សាខ្្ញុំបាទនឹង ប្រឹងប្រែងអោយអស់ពីសមត្ថភាពបង្ហាញពីពត៌មានដែល ខ្ញុំបាទបានរៀបចំទៅពន្យល់បង្ហាញអន្ដរជាតិហើយ និងធ្វើការស្វែងយល់ពីស្ថានភាពយុវជននៅបរទេសទៅលើកត្ដាវិជ្ជមាននិងអវិជ្ជមានក្នុងគោលដៅប្រៀបធៀបជាមួយយុវជនខ្មែរក្នុងបំណងរកគន្លឹះធ្វើយ៉ាងណាដើម្បីចូលរួមលើកកំពស់សមត្ថភាពនិងចំនុចវិជ្ជមានរបស់យុវជនខ្មែរ។
ក្រោយបញ្ចប់ទស្្សនកិច្ចសិក្សាខ្ញុំបាទតាំងចិត្តថាត្រូវតែធ្វើអោយបានសំរេចនូវរបាយការណ៍ស្ដីអំពីស្ថានភាពយុវជនខ្មែរនិងបរទេសនិងសារណាបញ្ចប់ការសិក្សារបស់ខ្ញុំក្នុងគោលដៅចូលរួមពង្រឹកចំនេះដឹងនិងចែករំ លែកបទពិសោធន៍ក្រោយពីខិតខំស្វែងយល់យ៉ាងស៊ីជំរៅកំឡុងពេលបំពេញទស្សនកិច្ចសិក្សានៅបរទេសក្រោមការទំនុកបំរុងរបស់អង្គការ។
ស្ថានភាពយុវជនកម្ពុជា៖
ក្នុងពេលបច្ចុប្បន្នត្រូវបានគេចាត់ទុកថា ជាសម័យចំហជើងមេឃឬជាសម័យទំនើបស៊ីវីល័យ។ការទំនាក់ទំនងរវាងវប្បធម៌ជាតិមួយនិងជាតិមួយដទៃទៀតគឺពុំអាចកាត់ផ្ដាច់បាន។រាល់ទំនាក់ទំនងនេះហើយទើបធ្វើអោយមានលំហូរនៃវប្បធម៌បរទេសមកក្នុងសង្គមខ្មែរដែលមានឥទ្ធិពលលើប្រជាជនពិសេសយុវជនបានកើតឡើងមិនអាចបញ្ចៀសបាន។
តាមការយកចិត្ដទុកដាក់និងបទពិសោធន៍ដ៏តិចតួចខ្ញុំសង្កេតឃើញថាបច្ចុប្បន្នយុវជនខ្មែរមួយចំនួនបានកំពុងផ្សាភ្ជាប់ទៅនិងពិភពលោកក្នុងបែបផែនសកលភាវូបនីកម្ម។កត្ដានេះហើយបានធ្វើអោយពួកគេមានចំនេះដឹងនិងសមត្ថភាពយ៉ាងពេញលេញអាចជាក្ដីសង្ឃឹមរបស់ប្រជាជននិងជាតិ។ប៉ុន្ដែទន្ទឹមនិងនេះយុវជនមួយចំនួនទៀតកំពុងតែ ធ្លាក់ក្នុងស្ថានភាពមួយគួរអោយបារម្ភបើពុំមានវិធានការទប់ស្កាត់ទាន់ពេលវេលាដោះស្រាយភាពអសកម្មដោយការចំលងវប្បធម៌មិនល្អពីបរទេសនិងភាពខ្វះចំនេះដឹងផ្ទាល់ខ្លួនទើបអោយពួកគេខ្លះប្រឈមមុខនិងគ្រឿងញៀនជា ក្រុមបងធំបង្កអសន្ដិសុខក្នុងសង្គម។
ដើម្បីធ្វើអោយប្រសើរឡើងស្ថានភាពយុវជន ៖
លើកទឹកចិត្ដអោយយុវជនក្នុងសកម្មភាពសង្គមជាអតិបរមា
ទប់ស្កាត់វប្បធម៌ពាលាពីបរទេស
បង្កើតក្លឹបឬសមាគមពិក្សាលើចំនុនអវិជ្ជមានយុវជន។

១ វិចារ | បេក្ខជន | តំណភ្ជាប់អចិន្ត្រៃ
បានដាក់ប្រកាស ដោយ doubleu

ស៊ុំ កល្យាណ

ខែ មករា 27, 2007

កល្យាណមានអាយុ២០ឆ្នាំ មានស្រុកកំនើតនៅក្រុងភ្នំពេញ ។ សព្វថ្ងៃ កល្យាណជានិស្សិតឆ្នាំទី៣ ផ្នែកធនាគារ និងហិរញ្ញវត្ថុនៅសាកលវិទ្យាល័យន័រតុន ។
មតិរបស់កល្យាណ៖
នាងខ្ញុំចង់ពង្រឹងនិងពង្រីកបន្ថែមនូវចំណេះដឹងខាងផ្នែកភាពជាអ្នកដឹកនាំ។នាងខ្ញុំមើលឃើញថាយុវជនភាគច្រើននៅមិនទាន់មានភាពក្លាហានក្នុងការធ្វើការងារនិងការសម្រេចចិត្ត។ដូច្នេះនាងខ្ញុំចង់ធ្វើជាគំរូល្អសម្រាប់ពួកគេ។ដោយមានការជឿទុកចិត្តលើខ្លួនឯងនិងមានការលើកទឹកចិត្តពីឳពុកម្តាយមិត្តភក្តិនិងអ្នករួមការងារស្ម័គ្រចិត្តទាំងអស់គ្នា។
កត្តាដ៏ចំបងក្នុងការជំរុញទឹកចិត្តអោយខ្ញុំ ចូលរួមក្នុងការប្រកួតប្រជែងនេះដោយសារទីមួយមានការផ្តល់ចំណេះដឹង និង ការលើកទឹកចិត្ត ពីលោកឈួន បូរិត ប្រធានអង្កការយុវជនខ្មែរ និង ការអភិវឌ្ឍសង្គម (KYSD) ដោយលោកគិតថាខ្ញុំ អាចមាន សមត្ថភាព ក្នុងការ ប្រកួតប្រជែង ក្នុងកម្មវិធីនេះ បាន ហើយអ្វីដែលធំមួយទៀត នោះគឺត្រូវនឹងការ រំពឹងទុក របស់នាង ខ្ញុំផ្ទាល់ តែម្តង ដោយ មានការចង់ ពង្រឹង និង ពង្រីកបន្ថែម ចំពោះ ចំណេះដឹងខាងផ្នែក “ ភាពជា អ្នកដឹកនាំ” តាមរយះការ ប្រកួតប្រជែងនេះ ដើម្បីទទួលបាន នូវចំណេះដឹងថ្មីៗ ពីបេក្ខជន ដែលបានដាក់ពាក្យ ប្រលងប្រជែង នេះ ទាំងអស់ ។ ទី២ ភាព ជាអ្នកដឹកនាំ ផ្ទាល់ខ្លួន នៅមិនទាន់ មានភាព ក្លាហាន ក្នុងការ ធ្វើការងារ និង ការសំរេចចិត្ត ផ្សេង ៗ ដូចនេះហើយ ទើបនាងខ្ញុំចង់ធ្វើ ជាគំរូមួយ ដ៏ល្អសំរាប់ពួកគេ ហើយអាច ទទួល បានពីការ សិក្សា និង ការផ្លាស់ប្តូរ បទពិសោធន៍ នៅ ពេលនេះ ទៅចែកចាយ ដល់ ពួកគេ តាមរយះ ការបើក វគ្គ បណ្តុះបណ្តាល រឺ អប់រំ បន្តតាម តែអាចធ្វើ ទៅបាន ។ ទី៣ ដោយ សារមាន ការជឿ ទុកចិត្ត លើខ្លួនឯង និង មានការ លើកទឹកចិត្ត ពីឪពុក ម្តាយ មិត្តភ័ក្រ្ត និង អ្នករួមការងារ ស្ម័គ្រចិត្ត ទាំង អស់គ្នា ។
ភាពជាអ្នកដឹកនាំ៖
ជាមនុស្ស ដែលរួសរាយរាក់ទាក់ សុភាពរាបសារ មានន័យ ថាជាមនុស្ស ដែលចេះ ស្វាគមន៍ ចំពោះ មនុស្ស ទូទៅ និង មិនច្រឡោងខាង មិនងាយអួត មិន ក្រអើតក្រទម។
មានភាពស្និតស្នាល និង ផ្តល់ទំនុកចិត្ត មានន័យ ថាអ្នកដឹកនាំ ត្រូវតែដឹង ពីសុខទុក្ខ និង ស្គាល់ គ្នាទៅវិញទៅមក និង មានទំនាក់ទំនង ល្អ ចេះផ្តល់ភាពកក់ក្តៅ ចំពោះ មនុស្ស ទូទៅ ។
ចេះផ្តួចផ្តើម គំនិត និង បំផុស គំនិត មានន័យថា យើង ជាអ្នក ដឹកនាំ ត្រូវតែ ឈានមុខគេ គឺត្រូវចេះ បំផុសគំនិត ដើម្បី អោយ សមាជិក របស់ខ្លួន ដឹង រឺ យល់។
ប្រកាន់ខ្ចាប់ នូវភាពយុត្តិធម៌ មានន័យថា មិនលំអៀង រឺ ទោទន់ទៅរក តែម្ខាងៗ រឺបក្សពួក និយមទេ។
ត្រូវធ្វើអោយអ្នក ចូលរួម មានសមត្ថភាព ក្នុងការ សំរេចបាន នូវគោលបំនង មានន័យថា ពួកគេ មានសិទ្ធិក្នុងការចូលរួមអោយ បានគ្រប់ៗគ្នា…។
ពេលខ្លះអ្នកដឹកនាំ មិនមានចំនុច ទាំងប៉ុន្មានខាងលើ នោះទេ តែគាត់អាច ជាអ្នកដឹកនាំ មួយរួប ដ៏ល្អដែរ ដោយសារ តែគាត់ មានបទពិសោធន៍ ក្នុងជីវិត ដែលទាក់ទង និង ការដឹកនាំ ហើយគាត់ អាច ដោះស្រាយ បញ្ហា ចំពោះមុខ បានយ៉ាងល្អ មានគំនិត ច្នៃប្រឌិត មានការ ស្រលាញ់ គាំទ្រ ពីមនុស្ស ទាំងឡាយ និង មានដុង ពីកំណើត ។
ស្តីពីបទពិសោធន៍ផ្ទាល់ខ្លួន៖
ធ្លាប់ ធ្វើ ជាប្រធាន ក្លឹប តំលៃនៃយុវជនខ្មែរ (VoKY) (អតីតក្លឹបCoDP បច្ចុប្បន្ន) នៃ អង្កការកម្មវិធី អភិវឌ្ឍន៍ ធនធានយុវជន(YRDP) បន្ទាប់ពីបាន រៀនចប់ វគ្គសិក្ខាសាលា “ ការអភិវឌ្ឍន៍ខ្លួនឯង” ក្រោមការបោះឆ្នោត ជ្រើសតាំង សិក្ខាកាម ដែលបានសិក្សាវគ្គនោះ ហើយធ្វើ ការដឹកនាំក្រុមចុះទៅ សំណេះសំណាល និង សិក្សាពីជីវភាព រស់នៅ របស់ប្រជាជន នៅ ភូមិ ប៉ែហែល ឃុំ សុព័រទេព ស្រុកច្បាមន ខេត្តកំពង់ស្ពឺ កាលពីថ្ងៃទី២៩ ខែ មករា ឆ្នាំ២០០៦។
ថ្ងៃទី២៨ ដល់ ៣១ ខែតុលា ឆ្នាំ២០០៦ ត្រូវបាន ចាត់តាំង ធ្វើជាអ្នកដឹកនាំ ក្រុមតូច ចុះទៅ ខេត្ត សៀមរាប ដើម្បី ធ្វើយុទ្ធនាការ រ៉ៃអង្គាស ថវិកា ដើម្បី អនាគត់ កុមារកម្ពុជា ក្រោម ប្រធានបទ “ ខ្ញុំរស់អ្នករស់ យើងរស់ទាំងអស់គ្នា” នៃអង្កការ KYSD (អ្នកស្ម័គ្រចិត្ត)។
ខែសីហាឆ្នាំ២០០៦មកដល់បច្ចុប្បន្នមានមុខងារជាម្ចាស់ភូមិគ្រឹះយុវជន(Youth Horse Leader)(អ្នកស្ម័គ្រចិត្តPart-time)នៃអង្គការKYSDក្នុងការដឹកនាំរៀបចំវគ្គបណ្ដុះបណ្ដាលនិងទំនាក់ទំនងស្ថាប័នផ្សេងៗ គ្នាដើម្បីធ្វើការផ្លាស់ប្ដូរបទពិសោធន៍រវាងស្ថាប័ននីមួយៗជាមួយសក្ខាកាមស្ម័គ្រចិត្តនៃអង្គការKTSDព្រមទាំងសិក្សាពីភាពជោគជ័យនៃស្ថាប័នទាំងនោះ។
ប្រសិនបើទទួលបានជ័យលាភី៖
ប្រសិនបើនាងខ្ញុំទទួលបានជ័យលាភីសំរាប់ការប្រកួតប្រជែងលើកនេះអ្វីដែលនាងខ្ញុំគំរោងនឹងធ្វើគឺខិតខំធ្វើការស្រាវជ្រាវផ្លាស់ប្ដូរស្វែងរកបទពិសោធន៍បន្ថែមខាងផ្នែកLeadershipនិងពង្រីកបន្ថែមនូវចំនេះដឹងថ្មីៗបន្ថែមទៀតតាមការប្រកួតប្រជែងនេះដើម្បីជាទុនក្នុងការអភិវឌ្ឍខ្លួនខ្ញុំអោយក្លាយជាអ្នកដឹកនាំល្អមួយរូបសំរាប់ខ្លួនខ្ញុំហើយធ្វើការចែកចាយនូវអ្វីដែលខ្ញុំមានបន្ដដល់អ្នកដែលខ្ញុំស្គាល់និងបន្ដដល់ជនរួមជាតិទាំងអស់ផ្ដល់ការគាំទ្រលើកទឹកចិត្តគ្រប់បែបយ៉ាងក្នុងជំរុញអោយយុវជនទូទៅក្លាយជាអ្នកដឹកនាំល្អចំពោះខ្លួនឯងចំពោះមនុស្សទូទៅ ជាពលរដ្ឋដ៏ល្អក្នុងចូលរួមកសាងប្រទេសជាតិមួយនេះដែលមិនទាន់មានភាពរីកចំរើនអភិវឌ្ឍន៍ទៅមុខខ្លាំងនៅឡើយអោយក្លាយជាប្រទេសជាតិមួយដែលប្រកាន់ខ្ជាប់នូវប្រជាធិបតេយ្យមួយពិតប្រាដកមានពោពេញទៅដោយធធានមនុស្សដែលខ្លាំងពូកែទាំងចំនេះដឹងនិងចំនេះធ្វើ ជាបុគ្គលមួយរូបដ៏ល្អដែលអាចពាំនាំនូវអ្វីដែលខ្លួនមានទៅចែកចាយដល់ប្រទេសជាមិត្តនិងប្រទេសដទៃទៀតបានស្គាល់បានដឹងថាប្រទេសយើងក៏មានភាពរីកចំរើន ជឿនលឿនមានសន្ដិភាព ស្ថេរភាពដូចប្រទេសដទៃៗទៀតដែរ។ហើយនិងធ្វើអោយយុវជនគ្រប់រូបបានដឹងថាខ្លួនយើងម្នាក់ៗពិតជាអាចធ្វើអ្វីៗបានគ្រប់យ៉ាងទាំងអស់អោយតែយើងចាប់ផ្ដើមនិងខិតខំធ្វើវាដោយការអំនត់និងរំពឹងទុកដ៏ពិតប្រាដកមួយ។
អំពីទស្សនៈវិស័យ៖
សា្ថនភាពរបស់យុវជនកម្ពុជានាពេលបច្ចុប្បន្នមានបញ្ហាជាច្រើនដែលទាក់ទងនិងការរស់នៅក្នុងសង្គមសព្វថ្ងៃដែលមានដូចជាការ៖ រើសអើងពីមនុស្សចាស់ថាក្មេងមិនចេះធ្វើការធ្វើអ្វីមិនកើត ទទួលការកេងប្រវ័ញ្ចកំលាំងពលកម្ម មានជីវភាពក្រីក្រ ទទួលបានការអប់រំតិចតូចឬនៅមានកំរឹតវប្បធម៌បរទេសអូសទាញ ភ្លើតភ្លើននឹងសំភារៈ(សំភារៈនិយម) បាត់បង់នូវសិទ្ធិសេរីភាពក្នុងការតវ៉ា ការគំរាមគំហែង ជំងឺអេដស៍ជំងឺកាមរោគ ទីផ្សារការងារមិនត្រូវសញ្ញាប័ត្រ ក្រុមបងតូចបងធំ ប្លន់លួចឆក់ កាប់សំលាប់ ការជួញដូរផ្លូវភេទ ការរំលោភសេពសន្តវៈ ជាដើម។
តាមរយៈបញ្ហាទាំងអស់នេះខ្ញុំគិតថាខ្ញុំនិងធ្វើជាជនគំរូមួយរូបដែលធ្វើខ្លួនមិនអោយគេមើលងាយ មិនអោយគេធ្វើការគាប់សង្កត់បំបាត់សិទ្ធិនោះទេ ហើយខ្ញុំនឹងចូលរួមគាំទ្រនិងជួយដោះស្រាយបញ្ហាទាំងឡាយអោយប្រសើរឡើងតាមរយៈការធ្វើការអប់រំផ្សព្វផ្សាយបណ្ដុះបណ្ដាលដល់យុវជនគ្រប់រូបដឹងពីសិទ្ធិ កាតព្វកិច្ច តំលៃរបស់ខ្លួនម្នាក់ៗ ចូលរួមជួយគ្រប់បញ្ហាលំបាកដែលអ្នករងគ្រោះត្រូវការ តាមលទ្ធិភាពដែលខ្ញុំអាចធ្វើបានទាំងកំលាំងកាយ ចិត្ត សំភារៈ ថវិកាឬអ្វីផ្សេងៗទៀត។

ទំលាក់ មួយវិចារ » | បេក្ខជន | តំណភ្ជាប់អចិន្ត្រៃ
បានដាក់ប្រកាស ដោយ doubleu

លី មិនា

ខែ មករា 27, 2007

លី មិនា មានអាយុ២២ឆ្នាំ មានស្រុកសិរីសោភ័ណ្ឌ ខេត្តបន្ទាយមានជ័យ សព្វថ្ងៃរស់នៅទីក្រុងភ្នំពេញជានិស្សិតឆ្នាំទី២នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ។
មតិក្នុងការជំរុញទឹកចិត្ត ៖
ខ្ញុំចង់បញ្ចេញនូវភាពក្លាហាន សមត្ថភាព ទេពកោសល្យរបស់ខ្លួន និង ចង់បានបទពិសោធន៍ថ្មីៗ ពីការប្រកួតប្រជែង និង ចង់សម្ដែងនូវឆន្ទះមួយថា យុវជនត្រូវតែហ៊ានបញ្ចេញសមត្ថភាពផ្ទាល់ខ្លួន ព្រោះយុវជនគឺជាទំពាំងស្នងឬស្សី ហើយកម្មវិធីនេះ មានបង្កប់នូវចំណេះដឹងល្អៗ ដើម្បីក្លាយខ្លួនជាអ្នកដឹកនាំ គ្រួសារ សហគមន័ … ការប្រកួតប្រជែងនេះ បានលើកទឹកចិត្ត និង ផ្ដល់កំលាំងចិត្តដល់យុវជនដើម្បីបង្ហាញយុវជនដែលមានសមត្ថភាពដើម្បីក្លាយជាយុវជនឆ្នើមដែលជាមនុស្សដ៏មានប្រយោជន៍សម្រាប់សង្គម និង ប្រទេសជាតិ ។
អំពីភាពជាអ្នកដឹកនាំ ៖
មេដឹកនាំល្អម្នាក់គួរមានគុណសម្បត្តិ ដូចជា មានចំណេះដឹងខ្ពង់ខ្ពស់ មានភាពឆ្លាតវៃ មានទេពកោសល្យ មានការជឿជាក់លើខ្លួនឯង មានទំនួលខុសត្រូវខ្ពស់ មានសីលធម៌រស់នៅល្អ ជាមនុស្សមានឥទ្ធិពលលើអ្នកដទៃ មានឥរិយាបថសមរម្យ ចំពោះអ្នកនៅក្រោមបង្គាប់ ហើយអ្នកដឹកនាំត្រូវមានការអភិវឌ្ឍន៍ ហ៊ានសម្រេចចិត្តធ្វើអ្វីមួយប្រកបដោយការត្រិះរិះពិចារណាខ្ពស់ ចេះទទួលយកគំនិតយោបល់ល្អៗ ពីអ្នកនៅក្រោមបង្គាប់ មិនអត្តនោម័តតែម្នាក់ឯង ទទួលយកការរិះគន់ដើម្បីស្ថាបនាពីអ្នកដទៃ ។
អំពីបទពិសោធន៍ ៖
ធ្លាប់ធ្វើជាអ្នកដឹកនាំក្នុងសាលា ពេលរៀននៅវិទ្យាល័យ គឺ ជាក្រុមប្រឹក្សាវិន័យ ដឹកនាំក្រុមពិភាក្សានៅពេលចូលរួមសិក្ខាសាសាផ្សេងៗ
ធ្លាប់បំផុសគំនិតឲ្យមិត្តរួមថ្នាក់ធ្វើការងារស្ម័គ្រចិត្តដោយចំណាយថវិការផ្ទាល់ខ្លួនដើម្បីចែកជួនក្មេងអនាថានៅសហគមន៍
ដឹកនាំមិត្តភ័ក្របង្កើតក្លឹបសិក្សានៅពេលទំនេរ ។
ប្រសិនបើជាប់ជាយុវជនឆ្នើម ៖
ខ្ញុំនឹងយកបទពិសោធន៍ និង ចំណេះដឹងដែលខ្ញុំទទួលបានទៅធ្វើការអប់រំមិត្តភ័ក្រ និង ធ្វើការណែនាំពួកគេឲ្យមានចិត្តក្លាហានបញ្ចេញនូវសមត្ថភាព ទេពកោសល្យ និង ចំណេះដឹងរបស់ពួកគេឲ្យក្លាយជាពលរដ្ឋល្អ និង ធ្វើជាគំរូដល់យុវជនដទៃ ឲ្យពួកគេដឹងថាយុវជនក៏មានសមត្ថភាពនិង ទេពកោសល្យអាចធ្វើជាអ្នកដឹកនាំបាន ហើយនិងធ្វើជាយុវជនគំរូម្នាក់សម្រាប់សង្គម ដោយបំផុសមិត្តភ័ក្រឲ្យពួកគេចំណាយពេលជួបជុំគ្នាដើម្បីទទួលយកចំណេះដឹង និង បទពិសោធន៍ ដែលខ្ញុំទទួលបានចែករំលែកឲ្យពួកគេ និង ណែនាំពួកគេឲ្យចែករំលែកចំណេះដឹងល្អៗទៅអ្នកដទៃទៀត ។
អំពីទស្សនៈវិស័យ ៖
តាមការអង្កេតរបស់ខ្ញុំ ស្ថានភាពយុវជនកម្ពុជាបច្ចុប្បន្នភាគច្រើនមានទឹកចិត្តក្លៀវក្លា ក្នុងការជួយការងារសង្គម ព្រោះនៅក្រោមអង្គការ សហគមន៍ជាច្រើនដែលពោរពេញទៅដោយយុវជនធ្វើការងារស្ម័គ្រចិត្ត ដូចជា ចុះទៅអប់រំដល់សហគមន៍ អំពីផលប៉ះពាល់នៃគ្រឿងញៀន គ្រឿងស្រវឹង ហើយនៅតាមសកលវិទ្យាល័យនានា មានចំនួនដ៏ច្រើនលើសលប់ដែលបានដាក់ពាក្យចូលរៀនដែលទាំងនេះគឺជាធនធានមនុស្សដ៏សំខាន់ ក្នុងការអភិវឌ្ឍន៍ប្រទេសជាតិ ប៉ុន្តែផ្ទុយមកវិញ យុវជនមួយភាគតូចកំពុងតែភ្លើតភ្លើននឹងសម្ភារៈ និង ការអូសទាញរបស់ពួកទម្មិឡ ដែលដើរទៅរកផ្លូវអបាយមុខ ហើយដើម្បីឲ្យស្ថានភាពយុវជនមានភាពល្អប្រសើរ ដំបូងគឺត្រូវចាប់ផ្ដើម គ្រួសារតាមដានរាល់សកម្មភាពសិក្សារបស់កូន បន្ទាប់មកគឺសាលារៀន ដោយផ្ដោតសំខាន់ទៅលើសីលធម៌រស់នៅ លើសពីនេះគឺរដ្ឋាភិបាលត្រូវបង្កើតឲ្យមានសិក្ខាសិលាផ្សេងៗដោយអនុញ្ញាតឲ្យយុវជនចូលរួម ។

ទំលាក់ មួយវិចារ » | បេក្ខជន | តំណភ្ជាប់អចិន្ត្រៃ
បានដាក់ប្រកាស ដោយ doubleu

ហួន ម៉ាលីន

ខែ មករា 27, 2007

ម៉ាលីនមានអាយុ២០ឆ្នាំ មានស្រុកកំនើតនៅឃុំទី១ ស្រុកកំពង់ឆ្នាំង ខេត្តកំពង់ឆ្នាំង ។ សព្វថ្ងៃម៉ាលីនជានិស្សិតឆ្នាំទី២នៅសាកលវិទ្យាល័យអាស៊ាន ។
មតិក្នុងការជំរុញទឹកចិត្ត ៖
គឺជាប្រធានបទដែលលើកយកមកនិយាយ ” សមត្ថភាពជាអ្នកដឹកនាំ ” មនុស្សជាច្រើនមានការរំភើបណាស់នៅពេលដែលបានឮពីប្រធានបទដែលនិយាយពីការដឹកនាំ ហើយការដឹកនាំធ្វើឲ្យយល់ច្បាស់ថា ការទំនាស់ និង ការប៉ះទង្គិចរវាងបុគ្គលម្នាក់ៗ ឬ ក្រុមមួយបានផ្ដល់នូវការបាត់បង់ពេលវេលា និង ខាតកំលាំង ហើយជាកត្តាមួយដែលបង្កើតឲ្យមានទឹកចិត្ត និង ការជំរុញទឹកចិត្តឲ្យមានភាពក្លាហាន និង យល់កាន់តែច្បាស់អំពីទំនាក់ទំនងមនុស្ស និង បង្កើតឲ្យមានចក្ខុវិស័យ គឺ រូបភាពខាងផ្លូវប្រាជ្ញា ខួរក្បាល និង ការមើលឃើញអ្វីដែលរីកចំរើន ជាពិសេសកម្មវិធីនេះជួយអប់រំ និង ផ្ដល់បទពិសោធន៍ ចំណេះដឹងថ្មីៗក្នុងភាពជាអ្នកដឹកនាំទៅអនាគត ហើយខ្ញុំចង់ដឹង ចង់ស្ដាប់ ថាតើអ្វីទៅអាចធ្វើឲ្យក្លាយជាអ្នកដឹកនាំដ៏ល្អ ? ព្រោះភាពជាអ្នកដឹកនាំត្រូវបានគេកំនត់ថា ជាការពិព័ណ៌នាអំពីបុគ្គលិកលក្ខណៈ ឥទ្ធិពល អាកប្បកិរិយា អំណាច ការសម្រេចគោលដៅ និង ការអភិវឌ្ឍន៍ទំនាក់ទំនងល្អ ។
អំពីភាពជាអ្នកដឹកនាំ ៖
ភាពជាអ្នកដឹកនាំគឺមានការស៊ីជម្រៅ និង ត្រូវបានគេផ្ដោតទៅលើបុគ្គលម្នាក់ៗដែលជាអ្នកដឹកនាំដ៏ល្អតាមរយះការអភិវឌ្ឍន៍ភាពជាអ្នកដឹកនាំ ។ អ្នកដឹកនាំគួរតែមានគុណសម្បត្តិដូចជា មានភាពអង់អាច ការភ្ញាក់រលឹក និង ភាពស្មោះត្រង់ មានទំនុកចិត្តលើខ្លួនឯង និង រៀនពីខ្លួនឯងឲ្យបានច្រើន មានថាមពល ចំណេះដឹងខ្ពស់ និង មានជំនាញមួយច្បាស់លាស់ យល់ពីមុខងារនៃការគ្រប់គ្រង មានរូបរាងកាយសមរម្យ និង រហ័សរហួន ការប្រើប្រាស់អំណាចស្របច្បាប់ដោយបញ្ជាទៅឲ្យអ្នកនៅក្រោមបង្គាប់ធ្វើការងារដែលត្រូវអនុវត្តន៍ទៅតាមបទបញ្ជាស្របច្បាប់ មានការលើកទឹកចិត្ត និង ផ្ដល់រង្វាន់ មានការសម្រេចចិត្តខ្ពស់ក្នុងការត្រិះរិះពិចារណារកហេតុផល និង មធ្យោបាយ អនុវត្តន៍ទោសបញ្ញត្តិចំពោះជនដែលមិនធ្វើតាម ឬ អនុវត្តខុស មានជំនាញឯកទេសដោយផ្ដល់បទពិសោធន៍ព័ត៌មាន ការអប់រំ និង បណ្ដុះបណ្ដាលបន្ថែម ចេះវិភាគទៅលើចំនុចខ្លាំង និង ចំនុចខ្សោយ ការឆក់យកឱកាស និង ការគំរាមកំហែង ។
អំពីបទពិសោធន៍ ៖
នៅក្នុងមហាវិទ្យាល័យដែលខ្ញុំរៀន លោកគ្រូបានដាក់លំហាត់អនុវត្តន៍ជាក្រុម ដោយក្នុងមួយក្រុមមានគ្នា ៧ នាក់ ចំណែកក្រុមរបស់ខ្ញុំគឺខ្ញុំជាមេក្រុម ។ ចំពោះការដឹកនាំបែបនេះវាមានលក្ខណៈតូចមែនតែវាមានការពិបាកបន្តិចសម្រាប់ខ្ញុំ ដោយសារវាជាបទពិសោធន៍ទីមួយ ។ មុនដំបូងខ្ញុំមិនទាន់ស្គាល់អ្នកដែលចូលរួមនៅក្នុងក្រុមទេ ។ ខ្ញុំបានបើកការប្រជុំក្រុមមួយដោយហៅឲ្យពួកគាត់មកជុំគ្នាដោយសម្ដែងចេញនូវការរាក់ទាក់ ស្និទ្ធស្នាល និង ធ្វើការស្រុះស្រួលគ្នា ដើម្បីងាយស្រួលក្នុងការអនុវត្តន៍ បន្ទាប់មកខ្ញុំបានលើកយកគំរោងដែលខ្ញុំបានធ្វើទុកមុនយកមកនិយាយ ហើយធ្វើការផ្លាស់ប្ដូរគំនិតគ្នាដោយយកមតិភាគច្រើន និង បែងចែកគ្នាធ្វើ ប៉ុន្តែនៅចំនុចខ្លះ គឺខ្ញុំជាអ្នកសម្រេច ។ ដោយភាពស្វះស្វែង និង ការចុះសម្រុងគ្នាបានធ្វើឲ្យក្រុមរបស់ខ្ញុំទទួលបានជោគជ័យ ។
ប្រសិនបើជាប់ជាយុវជនឆ្នើម ៖
ខ្ញុំមានគម្រោងធ្វើបន្តទៀតគឺខ្ញុំត្រូវតែខិតខំស្វែងរកចំណេះដឹង បទពិសោធន៍ និងអ្វីៗដែលកើតឡើងក្នុងពេលថ្មីទៀតនៅក្នុងសង្គមឲ្យបានច្រើន ជាពិសេសគឺការពាក់ព័ន្ធទៅលើការដឹកនាំ ។ ខ្ញុំចង់ដឹង ចង់យល់ ពីការដឹកនាំរបស់ប្រទេសដទៃដែលរួមមាន ស្ថានភាពសង្គម សេដ្ឋកិច្ច ប្រពៃណី ទំនៀមទំលាប់ និង ការពង្រឹងទៅលើយុវជននៅក្នុងប្រទេសដទៃទៀត ដើម្បីធ្វើការប្រៀបធៀបជាមួយប្រទេសយើង តើវាមានលក្ខណៈខុសគ្នាបែបណា ? ស្វែងយល់ឲ្យបានច្រើន បច្ចេកទេស និង ឥរិយាបថរបស់អ្នកដឹកនាំមួយដែលល្អ ព្រោះវាជាគោលបំណងរបស់ខ្ញុំចង់ក្លាយជាអ្នកដឹកនាំមួយដែលល្អ ទោះបីជាការដឹកនាំនោះមានលក្ខណៈតូចបែបណាក៏ដោយ ក៏ខ្ញុំនៅតែខិតខំតស៊ូ ជំនះរាល់ឧបសគ្គដើម្បីធ្វើឲ្យអនាគតរបស់ខ្ញុំឈានទៅដល់ការទទួលជោគជ័យ ។ ដូចសុភាសិតមួយបានលើកឡើងថា ” តស៊ូគង់បានសម្រេច ” បន្ទាប់មកខ្ញុំចង់ចូលរួម និង ជួយផ្សព្វផ្សាយអំពីបញ្ហាដែលពាក់ព័ន្ធទៅនឹង យុវជនកម្ពុជា និង ចង់ឲ្យយុវជនដែលដើរផ្លូវខុសឲ្យពួកគាត់មានស្មារតីភ្ញាក់រលឹកឡើង ។
អំពីទស្សនៈវិស័យ ៖
ស្ថានភាពរបស់យុវជនកម្ពុជាក្នុងពេលបច្ចុប្បន្នគឺ មានច្រើនណាស់ដែលពួកគេមានការភ្លើតភ្លើនទៅនឹងផ្លូវអបាយមុខដូចជា គ្រឿងញៀន ស្រីស្រា និង ល្បែងជាដើមទៀត ដោយពួកគេពុំទាន់យល់ច្បាស់ពីអនាគតទៅថ្ងៃមុខ ហើយចំពោះយុវជនខ្លះដោយសារឪពុកម្ដាយរបស់ពួកគេមិនយកចិត្តទុកដាក់ ឬក៏មានបញ្ហាអ្វីនៅក្នុងគ្រួសារ ទើបធ្វើឲ្យគាត់មានអារម្មណ៍តូចចិត្តខ្លួនឯង និង ដើរទៅរកផ្លូវខុស ឬ ត្រូវបានមិត្តភ័ក្តអូសទាញ ម្យ៉ាងទៀតដោយស្ថានភាពគ្រួសារមានជីវភាពមិនគ្រប់គ្រាន់ ខ្វះថវិកាសម្រាប់ផ្គត់ផ្គង់កូនរៀន ។ ដូចនេះដើម្បីធ្វើឲ្យប្រសើរឡើងនៃស្ថានភាពយុវជនគឺ សូមឲ្យរដ្ឋាភិបាល និង តាមអង្គការក្រៅរដ្ឋាភិបាល ខិតខំពង្រឹងបន្ថែមលើការផ្សព្វផ្សាយ ពន្យល់ ផ្ដល់បទពិសោធន៍ និង ផ្ដល់ការរៀនអាហារូបករណ៍សម្រាប់យុវជនដែលខ្វះខាតថវិកាឲ្យបានរៀនបន្ត និង បង្ហាញឲ្យឃើញអំពីមិត្តចេះស្រលាញ់មិត្ត មិត្តចេះជួយទាញគ្នាឲ្យដើរផ្លូវល្អ ហើយដោយឆ្លុះបញ្ចាំងដោយការលើកទឹកចិត្ត ព្រោះថាយុវជនគឺជាសសរទ្រូងរបស់ប្រទេសជាតិ ។

១ វិចារ | បេក្ខជន | តំណភ្ជាប់អចិន្ត្រៃ
បានដាក់ប្រកាស ដោយ doubleu

ហ៊ីង សុខសាន្ត

ខែ មករា 27, 2007

ហ៊ីង សុខសាន្ត ហ៊ីង សុខសាន្ត មានអាយុ ២៧ឆ្នាំ មានស្រុកកំនើតនៅស្រុកកៀនស្វាយ ខេត្តកណ្តាល សព្វថ្ងៃរស់នៅក្រុងភ្នំពេញ ។ សព្វថ្ងៃសុខសាន្តជាសមាជិកចលនានិស្សិតដើម្បីលទ្ធិប្រជាធិប្បតេយ្យ ជាមន្ត្រីអប់រំ និងកីឡា ពីឆ្នាំ២០០៥ ។ សុខសាន្តចូលរួមក្នុងកម្មវិធីយុវជនឆ្នើមដើម្បីទទួលយកបទពិសោធន៍ និងចង់វាស់ស្ទង់សមត្ថភាពរបស់ខ្លួនផងដែរ ។
មតិរបស់សុខសាន្ត៖
អំពីការចូលរួមកម្មវិធីយុវជនឆ្នើម៖
មូលហេតុដែលជាការជំរុញទឹកចិតខ្ញុំបាទអោយចូលរួមក្នុងការប្រកួតប្រជែងក្នុងកម្មវិធីយុវជនឆ្នើម ព្រោះខ្ញុំយល់ឃើញថាកម្មវិធីនេះនឹងផ្តល់ឪកាសដើម្បីបង្ហាញនៅសមត្ថភាព និងទេពកោសល្យការត្រៀមខ្លួនយ៉ាងណាដើម្បីក្លាយជាអ្នកដឹកនាំនៃយុវជនឆ្នើម។ ជាងនេះទៅទៀតកម្មវិធីនេះនឹងធើ្វអោយខ្ញុំអាចវាស់ស្ទងសមត្ថភាពរបស់ខ្លួនក្នុងពេលប្រកួតប្រជែងជាមួយយុវជនដទៃទៀត ពិសេសខ្ញុំក៏អាចទទួលបាននូវបទពិសោធន៍ និងមេរៀនល្អៗទៀតផង។ មួយផ្សេងទៀតកម្មវិធីនេះអាចផ្តល់អត្ថប្រយោជន៍ជាច្រើន ខ្ញុំមិនធ្លាប់មាន ហើយពេលនេះកំពុងចង់បាននោះគឺទស្សនៈកិច្ចសិក្សានៅក្រៅប្រទេស។
អំពីភាពជាអ្នកដឹកនាំ៖
ការដើម្បីក្លាយជាមេដឹកនាំល្អម្នាក់ គួរតែមេដឹកនាំនោះមានគុណសម្បត្តិជាមេដឹកនាំប្រកបដោយទសពិទរាជធម៌ ហើយត្រូវតែមានទំនាក់ទំនងជាមួយប្រជាពលរដ្ឋដែលជាម្ចាស់ឆ្នោតនៅទូទាំងប្រទេសអោយបានញឹកញាប់ និងស្និទស្នាល ដើម្បីពន្យល់ប្រជាពលរដ្ឋអោយយល់ពីកម្មវិធីនយោបាយ គំរោងការរបស់ខ្លួន ជាប្រយោជន៍អោយប្រជាពលរដ្ឋចូលរួម និងគាំទ្រ។ ម្យ៉ាងទៀត អ្នកដឹកនាំមិនត្រឹមតែពន្យល់បណ្ណោះទេ ប៉ុន្តែក៏ត្រូវស្តាប់មតិ និងសំណូមពរ ហើយឆ្លើយតបយ៉ាងសមស្របទៅនឹងសេចក្តីត្រូវការរបស់ប្រជាពលរដ្ឋផងដែរ។

ស្គាល់ ដំណើរការ ដែលត្រូវដឹកនាំ
ស្គាល់ បែបផែន ដឹកនាំ តាមរបៀបណា
ស្គាល់ សមត្ថភាពខ្លួន ក្នុងការដឹកនាំ
ស្គាល់ មនុស្ស ដែលខ្លួន ដឹកនាំ មានលក្ខណៈយ៉ាងណា។

អំពីបទពិសោធន៍ផ្ទាល់ខ្លួន៖
កន្លងមកនេះ ខ្ញុំធ្លាប់បានចូលរួមក្នុងការងារសង្គមជាច្រើនដែលបានធ្វើអោយខ្ញុំទទួលបាននូវបទពិសោធន៏ដែលអាចឆ្លើយតបទៅនឹងស្ថានភាពរស់នៅសព្វថ្ងៃ។ផ្សេងនេះខ្ញុំក៏ធ្លាប់ទទួលភារកិច្ចរៀបចំ និងធ្វើជាអ្នកសំរបសំរួលក្នុងសិក្ខាសាលា វគ្គបណ្តោះបណ្តាលដើម្បី
ផ្សព្វផ្សាយលទ្ធិប្រជាធិបត្យេយ ដល់និស្សិត និងយុវជននានានៅស្នាក់កាលចលនានិស្សិតដើម្បីលទ្ធិប្រជាធិបតេយ្យ។ ខ្ញុំធ្លាប់បានដឹកនាំនិស្សិតចូលរួមវេទិការសាធារណៈដោយCCHRសិក្ខាសាលាដោយ NICFEC ពិសេសធ្លាប់ដឹកនាំសមាជិកសមាជិការចលនានិស្សិតចូលរួមទិវាសិទ្ធិមនុស្សអន្តជាតិ ១០ ធ្នូ ២០០៥។ ថ្មីៗនេះក្នុងឋានៈជាមន្រ្តីអប់រំ និង កីឡា គឺតែងតែដឹកនាំក្រុមកីឡាករចូលរួមប្រកួតជាមួយបណ្តាលអង្គការ និង ក្រុមហុ៑ននានា។នៅពេលខាងមុខនេះនឹងចូលរួមប្រកួតពានរង្វាន់មហាជនទូទាំងប្រទេស។
ប្រសិនបើជាប់ជាយុវជនឆ្នើម៖
បើខ្ញុំមានសំណាង និង សមត្ថភាព ទទួលបានជ័យលាភី ក្នុងកម្មវិធីយុវជនឆ្នើម គំរោងជាបន្តទៀត ដែលត្រូវធើ្វនោះគឺខិតខំប្រឹងប្រែង និង ដកស្រង់បទពិសោធន៍ល្អៗដែលទទួលបានពីការប្រកួតប្រជែង ពិសេសមេរៀន និងបទពិសោធន៍ដែលទទួលបាននៅក្នុងការធើ្វទស្សនកិច្ចសិក្សានៅបរទេស ដើម្បីយកមកបំរើផលប្រយោជន៍សង្គមជាតិកម្ពុជា ក្នុងការលើកស្ទួយលទ្ធិប្រជាធិបតេយ្យ ការពារផលប្រយោជន៍យុវជន ធ្វើអ្វីដើម្បីយុវជនពិសេស គឺការបំផុសយុវជនអោយស្គាល់ពីតួនាទិ សិទ្ចិ និងករណីកិច្ចរបស់ខ្លួនដើម្បីចូលរួមយ៉ាងសកម្មក្នុងការកសាងសង្គម។
អំពីស្ថានភាពយុវជន៖
តាមការសងេ្កតរបស់ខ្ញុំឃើញថា ស្ថានភាពយុវជនកម្ពុជាក្នុងពេលបច្ចុប្បន្ននេះគឺកំពុងជួបប្រទៈនុវការរងគ្រោះយ៉ាងខ្លាំងគឺមានន័យថាពួកគេកំពុងត្រូវបានពង្វួកជាមួយអំពើអបាយមុខផ្សេងៗ ដូចជាល្បែងស៊ីសង ការសេពគ្រឿងញៀន និងអំពើអនាចារផ្លូវភេទដទៃ
ទៀត ។ ផ្ទុយទៅវិញ យុវជនមួយក្រុមទៀត ដែលសេ្នហាយុត្តិធម៏ ប្រជាធិបតេយ្យ បែរជាត្រូវទទួលរងគ្រោះការបង្រាបពីសំណាក់អាជ្ញាធររដ្ជាភិបាល ការបំបាក់ស្មារតី ការលួងលោម បោកប្រាសពីអ្នកនយោបាយមួយចំនួនទៅវិញ។ ដើម្បីស្តារស្ថានភាពទាំងនោះប្រសើរឡើងលុះត្រាតែយុវជនទាំងអស់យល់ច្បាស់ពីតំលៃរបស់ខ្លួន តួនាទី និងភារកិច្ចត្រូវធើ្វអ្វីខ្លៈនៅក្នុងសង្គម ហើយត្រូវប្រាសចាក់ពីអំពើអបាយមុខនានាដែលនាំអោយសង្គមស្អបខ្ពើម។ ម្យ៉ាងទាំងរដ្ជាភិបាលក្ដី សង្គមស៊ីវិលក្តី ត្រូវការពារ និង ផ្តល់ប្រយោជន៍ដល់យុវជនអោយបានច្រើន ។ ពិសេសរដ្ជាភិបាលត្រូវផ្តល់់ឪកាសចូលរួមអោយបានច្រើនសំរាប់យុវជន។

ទំលាក់ មួយវិចារ » | បេក្ខជន | តំណភ្ជាប់អចិន្ត្រៃ
បានដាក់ប្រកាស ដោយ doubleu

ផន សុភី

ខែ មករា 27, 2007

សុភីមានអាយុ ២០ឆ្នាំ មានស្រុកកំនើតនៅស្រុកកោះសុទិន្ទ ខេត្តកំពង់ចាម ហើយសព្វថ្ងៃរស់នៅក្រុងភ្នំពេញជានិស្សិតឆ្នាំទី ២ នៅសាកលវិទ្យាល័យភូមិន្ទ ភ្នំពេញ ។
មតិក្នុងការជំរុញទឹកចិត្ត ៖
- ចង់ចែកចាយបទពិសោធន៍ដែលខ្លួនមានគឺថាអ្វីដែលខ្ញុំមានមិនចង់លាក់ទុកឡើយគឺចង់រួមចំណែកក្នុងការលើកកំពស់សមត្ថភាពយុវជនជំនាន់ក្រោយឲ្យមានស្មារតីខិតខំប្រឹងប្រែងបន្តទៅទៀត
- ចង់បានបទពិសោធន៍ និង ចំណេះដឹងថ្មីៗពីអ្នកចូលរួមមកវិញ ព្រោះខ្ញុំគិតអ្វីដែលនាងខ្ញុំមានគឺវាមិនទាន់គ្រប់គ្រាន់ពេញបរិបូរនៅឡើយទេ
- ចង់ពង្រឹងសមត្ថភាព និង ចង់បង្កើតភាពក្លាហានឲ្យបានច្រើន ត្រង់នេះគឺថាខ្ញុំត្រូវឡើងប្រកួតប្រជែងជាមួយមនុស្សជាច្រើន ហេតុនេះខ្ញុំត្រូវមានស្មារតី និង តាំងអារម្មណ៍ជាមុន
- ចង់ប្រកួតប្រជែងឲ្យដឹងពីសមត្ថភាពរបស់ខ្លួន ថាតើនៅមានចំនុចខ្វះខាត និង ចំនុចខ្សោយប៉ុណ្ណាទៀតដើម្បីងាយធ្វើការកែប្រែ
- ចង់ទទួលបានរង្វាន់ដ៏មហាសាលពិសេសគឺដំណើរទស្សនកិច្ចទៅកាន់បរទេសព្រោះខ្ញុំចង់ដឹងថាតើប្រទេសក្រៅ និង ប្រទេសយើងមានលក្ខណៈយ៉ាងម៉េច
- ចង់ទទួលបានកិត្តិយស និង កេរ្តិ៍ឈ្មោះល្អ ព្រោះពាក្យថា យុវជនឆ្នើមពិតជាមិនធម្មតាទេ ។
អំពីភាពជាអ្នកដឹកនាំ ៖
- មានបទពិសោធន៍ និង មានចំណេះដឹង
- មានសីលធម៌ល្អ និង សុច្ចរិតត្រឹមត្រូវ
- មានភាពស្មោះត្រង់
- មានភាពអត់ធ្មត់ មិនធ្វើអ្វីដោយតក់ក្រហល់ ឬ ធ្លាក់ទឹកចិត្ត
- មានគំនិតច្នៃប្រឌិត និង អភិវឌ្ឍន៍
- មានទំនាក់ទំនងល្អជាមួយអ្នកដទៃ មានន័យថាចេះសួរ និង ចេះស្ដាប់ដោយភាពវាងវៃពិសេសមានសិល្បះក្នុងការធ្វើទំនាក់ទំនង
- មានទំនាក់ទំនងល្អ មានគំរោងច្បាស់លាស់ប្រកបដោយក្ដីសង្ឃឹម និង មានយុទ្ធសាស្ត្រ
- មិនបង្កភាពអន្តរាយដល់អ្នកដទៃ
- ចេះបង្ហាញពីគំរូល្អៗដល់អ្នកដទៃ
- ជាមនុស្សដែលមានទសពិធរាជធម៌នៅក្នុងខ្លួន (ធម៌ទាំង ១០)
អំពីបទពិសោធន៍ ៖
- ២០០៣-២០០៤ ធ្វើជាប្រធានថ្នាក់មាននាទីគ្រប់គ្រងសមាជិកក្នុងថ្នាក់ ជាអ្នកផ្ដល់ព័ត៌មានទៅកាន់សាលា និង ពីសាលាទៅកាន់សមាជិកវិញ
- ២០០៤-២០០៥ ធ្វើជាប្រធានថ្នាក់ដដែល
- ២៩ កក្កដា ២០០៦ បើកសិក្ខាសាលា ដឹកនាំក្រុមពិភាក្សាដើម្បីអនុវត្តន៍បញ្ចប់វគ្គ ភាពជាអ្នកដឹកនាំ និង បច្ចេកទេសសម្របសម្រួល
- ២៩ តុលា ២០០៦ ចុះសម្របសម្រួល ដឹកនាំក្រុមកុមារ និង អប់រំស្ដីអំពីអំពើហិង្សា និង សន្តិភាព
- ១០-១១-១២ ធ្នូ ២០០៦ ជាគណកម្មការរៀបចំស្តង់ក្នុងការតាំងពិព័ណ៌ ” ទេពកោសល្យ និង ស្នាដៃយុវជនដើម្បីសន្តិភាព ” របស់ YFP
ចូលរួមចែកចាយបទពិសោធន៍ជាមួយនិស្សិតឡាវ នៅ YFP
- ចូលរួមសកម្មភាពការងារសង្គមមួយគឺរើសសម្រាមជំវិញបរិវេណវត្តភ្នំ ក្បាលឆាយ មាត់ទន្លេជាមួយ SNP
ប្រសិនបើជាប់ជាយុវជនឆ្នើម ៖
ខ្ញុំពិតជាមានភ័ព្វសំណាងមួយដ៏ខ្ពស់បំផុតសម្រាប់ខ្ញុំដែលមិនធ្លាប់មានពីមុនមក ។ ចំពោះគំរោងនឹងធ្វើបន្តទៀតគឺថាខ្ញុំនឹងខិតខំព្យាយាមពង្រឹងនូវចំណេះដឹងបន្ថែមទៀតពិសេសស្វែងរក ស្រាវជ្រាវ និង ហ្វឹកហាត់បន្ថែមលើជំនាញភាពជាអ្នកដឹកនាំឲ្យបានល្អប្រសើរព្រោះខ្ញុំគិតថាបទពិសោធន៍ និង ចំណេះដឹងត្រឹមនេះមិនទាន់គ្រប់គ្រាន់ពេញលេញបរិបូរណ៍នៅឡើយទេ ។ ចំនុចដែលសំខាន់គឺថានាងខ្ញុំនឹងចែកចាយ អប់រំដល់យុវជនជំនាន់ក្រោយៗឲ្យមានភាពប៉ិនប្រសប់ ការច្នៃប្រឌិតខ្ពស់ ភាពជាម្ចាស់ការ ជាពិសេសផ្នែកសីលធម៌ដើម្បីប្រែក្លាយជាមេដឹកនាំមួយពេញលេញដែលអាចដឹកនាំខ្លួនឯង និង សង្គមជាតិទាំងមូលឆ្ពោះទៅរកការអភិវឌ្ឍន៍ ។ លើសពីនេះខ្ញុំនឹងព្យាយាមបំផុសគំនិតដល់យុវជនឲ្យមានសកម្មភាពល្អនៅក្នុងសង្គមដូចជា វាចាគពីគ្រឿងញៀន ហិង្សា ជំងឺអេដស៍ សង្គមមានសោភ័ណភាព បរិយាកាសល្អ …ថែមទៀតផង ។
អំពីទស្សនៈវិស័យ ៖
ស្ថានភាពរបស់យុវជនកម្ពុជាក្នុងពេលបច្ចុប្បន្នគឺមានភាពពិបាក និង តឹងតែងជាទីបំផុត ព្រោះថាសង្គមយុវជនសព្វថ្ងៃពោរពេញដោយគ្រឿងញៀន ហិង្សាកាប់ចាក់ តម្លៃសីលធម៌នៅក្នុងសង្គមកាន់តែធ្លាក់ចុះ ភាពអត់ការងារធ្វើកាន់តែកើនឡើងជាដើម ក៏ប៉ុន្តែក៏នូវមានយុវជនមួយចំនួនមានវប្បធម៌ល្អចាកផុតពីអំពើពាលាដោយខិតខំរៀនសូត្រ ចូលរួមចំណែកការងារនៅក្នុងសង្គមយ៉ាងផុសផុលផងដែរ ។ ចំពោះគំនិត និង ទស្សនវិស័យដើម្បីចូលរួមស្ដារស្ថានភាពរបស់យុវជនគឺ ៖
- អប់រំ និង ផ្សព្វផ្សាយជាបន្តដល់យុវជននៅតាមគ្រប់តំបន់
- ឲ្យតម្លៃ និង លើកទឹកចិត្តដល់យុវជនឲ្យមានការច្នៃប្រឌិត
- ផ្ដល់ឱកាសឲ្យយុវជនបានជួបជុំគ្នាដើម្បីផ្លាស់ប្ដូរបទពិសោធន៍គ្នា ចំនុចដ៏ពិសេសនេះគឺថា រដ្ឋាភិបាលក៏ដូចជាស្ថាប័ន អង្គការ NGOs នានាគួរតែបង្កលក្ខណៈងាយស្រួលដល់យុវជនបានចូលរួមសកម្មភាពក្នុងសង្គម ចេះធ្វើទំនាក់ទំនងល្អ ចេះសហការណ៍ជាមួយស្ថាប័ននានា ចេះយកចិត្តទុកដាក់ពីបញ្ហាសង្គមដោយទទួលស្គាល់នូវតួនាទី និង សមត្ថភាពរបស់ខ្លួនក្នុងការចូលរួមដោះស្រាយ ។

ទំលាក់ មួយវិចារ » | បេក្ខជន | តំណភ្ជាប់អចិន្ត្រៃ
បានដាក់ប្រកាស ដោយ doubleu

យុវជនឆ្នើម

សបា្តហ៍ទី១

ហ៊ុល ស្រីនាង

កូវ គារ៉ា

ព្រំ សុគន្ធារី

សួន ចំរើនភារៈ

រុន វណ្ណយ៉ា

ស៊ុន សុវត្ថា

ហេង សុជាតា

ស៊ន សារ៉ាត

ប៉ុន ពិសី

អេង ហ៊ុយឡេង

ស៊ុំ កល្យាណ

លី មិនា

ហួន ម៉ាលីន

ហ៊ីង សុខសាន្ត

ផន សុភី

បណ្ណសារ

ចំណាត់ក្រុម